Brugseni Pisiffillu nioqqutissanik Qeqertarsuup Tunuanut timmisartukkut assartuititsisut

Nioqqutissat ilaat Qeqertarsuup Tunuani pisiniarfinni amigaataapput. Royal Arctic Linep nioqqutissanik pajuttaataa sikusimanera pissutigalugu Sisimiut avannaannukarsinnaanngilaq.

Taamaammat nioqqutissat ilaat Nuummut utertinneqartariaqarsimasut, Brugsenip tuniniaanermut pisortaa, Jes Nyborg oqarpoq.

- Inerititat naatitallu apuussinnaanngisagut, Nuummi pisiniarfissuatsinnut utertippagut, taakkunaniillu sapinngisamik amerlanersaat tassani tuniniarniarsarineqarlutik, Jes Nyborg oqarpoq.

Brugseni Ilulissani pisinarfeqarpoq.

AAMMA ATUARUK Mary Arctica kan ikke nå frem til Diskobugten: Familie med allergiker bliver hårdt ramt

Nioqqutissat asiujanngitsut amigaataanngitsut taanna oqarpoq.

- Immuliorfimmi nioqqutissiat immussuillu taavalu inerititat naatitallu pillugit maannatut isikkoqartillugu unammillernartoqartitsilaarpugut, Jes Nyborg oqarpoq.

Taassuma ilanngullugu oqaatigaa, nioqqutissat amigaataasut timmisartutigut nassiuttalersimagitsik. Aammali taamaaliornermi ajornartorsiuteqarpoq.

- Akisuvoq. Assartuinermuinnaq sapaatit akunnerannut 25.000 koruuninik atuisariaqartassaagut, Jes Nyborg oqarpoq.

AAMMA ATUARUK Længe ventede forsyninger rammer endeligt Ittoqqortoormiit

Brugsenillu taama aningaasartuuteqarnerugami akinik qaffaasariaqarsimalluni, tuniniaanermut pisortaq oqarpoq.

- Assartuinerup akiata affaa matussuserniarlugu nioqqutissat akii qaffappagut, affaatalu aappa nammineq annaasaqaatitut tiguarput, taanna oqarpoq.

Aamma Pisiffik Ilulissani Aasiannilu pisiniarfimminut nioqqutissanik timmisartukkut maanna assartuisarpoq.

- Air Greenlandip neqeroorutigisinnaasai tamaasa atorlugit timmisartukkut assartuinissamut sapinngisarput tamaat ilungersorpugut, Pisiffiup ussassaarinermut pisortaa, Tina Hansen, allakkatigut akissuteqarluni allappoq.

Pisiffik pisunut malinnaasoq, nioqqutissanillu nalinginnaasumik pilersuisoqaleqqingajalissasoq neriuutigalugu ilanngullugu allappoq. Qaquguli nalinginnaaleqqissanersoq naatsorsuutiginerlugu allanngilaq.

Pissutsilli suli taamaakkallarnissaat Brugsenimi naatsorsuutigaat.

- Silasiortuunngikkaluarlunga sikumullu ilisimatuujunngikkaluarlunga sapaatit akunneri arlallit suli taamaakkallarnissaa eqqoriarsinnaavara. Umiarsuit immaqa sapaatit akunneri pingasut, sisamat tallimalluunniit qaangiuppata tulassinnaanngoqqissapput, Jes Nybortg oqarpoq.