Brugsenip sukkulaatit piiarai: Kinderægini salmonellamik nassaartoqartoq
Meeqqat Kinderægimik pitseqqammersimagukkit immaqa igiinnarnissaat eqqarsaatigisariaqarpat.
Kinderimit nioqqutissat arlallit matumani Kinderæg ilanngullugu pisiniarfinnit uterteqquneqarput.
Tamanna salmonellaqarsinnaanerisa aarlerinarnerannik pissuteqarpoq.
Danmarkimi inuussutissanut aqutsisoqarfik tusagassiutinut taama ilisimatitsisoq, Ritzau allappoq.
AAMMA ATUARUK Nuuk Imerup Brugsenillu sodavandinik unioqqutitsisumik tuniniaasoqartarneraraat
Kalaallit Nunaanni Brugsenip Kinderip sukkulaatiliaasa salmonellaqarsinnaanerannik ilisimatitsissut ippassaq unnukkut pingasunngornermi tigusimagaa, Kalaallit Nunaanni Brugsenip tuniniaanermut pisortaata Jes Nyborgip KNR-imut uppernarsarpaa.
Nioqqutissat uku uterteqquneqarput:
Kinder Surprise, nettoindhold 20 g, nioqqutissat tamarmik 26.06.2022-mit 07.10.2022-mut ullulerneqarsimasut
Kinder Surprise, nettoindhold: poortakkaartut 20g x 3. Nioqqutissat tamarmik 26.06.2022-mit 07.10.2022-mut ullulerneqarsimasut
Kinder Surprise Maxi, nettoindhold: 100g. Nioqqutissat tamarmik 20.04.2022-mit 21.08.2022-mut ullulerneqartut
Kinder Schokobons, Nioqqutissat tamarmik 25.05.2022-mit 19.08.2022-mut ullulerneqartut
Kinder Mini Eggs, Nioqqutissat tamarmik 21.08.2022 ullulerneqartut
Paasissutissarsiffik: Danmarkimi inuussutissanut aqutsisoqarfik
Sukkulaatit pineqartut Brugsenip pisiniarfiinit tamanna pillugu peerneqartut tuniniaanermut pisortap nassuiaatigaa.
Pisiffiup nioqqutissat aamma piiarai Pisiffik facebookimi paasissutissiivoq.
Sukkulaatiliortut Ferrero Scandinavia, Kinderip sukkulaataataannik tunisassiortuusut, tunisassiatik uterteqquaat.
Sukkulaatit ullumi misissorsigit
Kinderip sukkulaatiliai pineqartut tassaapput: Kinder Surprise, Kinder Surprise Maxi, Kinder Schokobons kiisalu Kinder Mini Eggs, taakkualu tassa uterteqquneqarput. Pisiniartartut Kinderip sukkulaatiliaannik pisisimasut pisiatik pisiniarfimmut utertissagaat, igiinnassagaalluunniit, Danmarkimi inuussutissanut aqutsisoqarfiup kaammattuutigaa.
Salmonellap bakteriaata kinguneranik napparsimanerup takussutissai tassaapput: Timminneq, naarlunneq, kissarneqarneq, niaqorlunneq taavalu aamma meriannguneq meriarnerlu.
Napparsimaneq ullualunnit sapaatinik akunnernik arlalinnik sivisussuseqarsinnaavoq.
Napparsimaneq ajornerulerpat sivisuneruppallaalluunnit nakorsamut attaveqartoqarsinnaavoq.
