Paavip meeqqat saarnginik nassaartoqarneranut misiginneqatiginninnera naammagineqanngitsoq

Paavi Fransip qanga atornerluisoqartarsimaneranut atatillugu misiginneqatiginninnera naammanngitsoq, Canadami nunap inoqqaavisa aqutsisui isumaqarput.

Meeqqat 215-it saarngi, nuna inoqqaavisa ineqarfigiutigalugu atuarfiisa ilaata eqqaani nassaarineqareersullu utoqqatsertoqarnissaa taakku piumasaraat.

Nunap inoqqaavisa meeraartaat ineqarfigiutigalugu atuarfinni atualersinneqartarsimapput, kulturertik qimallugu nunat killiit kulturiannut inooriaasiannullu sangutinniarneqartarsimallutik.

Atuarfiit taamaattut nunap inoqqaavisa meerartaannut immikkut atuarfiusimapput, tassani ilaatigut atornerlunneqartarsimallutik peqqinnanngitsumillu nerisinneqartarsimallutik.

Ineqarfiutigalugu atuarfiit amerlasuut ilagiinnit katuullinit aqunneqarput.

Atuarfiup, meeqqat saarngiinik nassaarfiusup, inuit 50-iinnaat toqusimasutut allattorsimasuutigai.

AAMMA ATUARUK Canadamit ilanngutassiortoq meeqqat saarngisa nassaarineqarnerat pillugu: Eqqortumik utoqqatseqqusisoqarpoq

Pisortatigoortumik utoqqatsertoqarnissaa assigiinngitsunit piumasarineqareersorlu paavip misiginneqatiginninnini sapaatiummat oqaatigaa.

- Alianaqisumik nassaartoqarnerata anniaatigineqarnera paasivara, qanga pisimasut anniaatigineqarnerat paasivara, paavi Fransip sapaatit-akunnikkaartumik Vatikanimi Peterspladsenimit pilluaqqussuteqarnermini ilaatigut oqaatigaa.

- Nalaatatta artornangaartup eqqaaseqqiinnarpaatigut, nunasiaateqarnerup periuserisartagarisimasaaniit illikartariaqartugut. Taakkuullutalu Canadap inuisa kulturikkut naleqatitaat pisinnaatitaaffiilu ataqqeqatigiiffigigalugit oqaloqatigiissinnaalluta, paavi itisiliivoq.

Nunap inoqqaavi pisortatigoortumik utoqqatserfigineqanngillat.

Tamannalu nunap aqutsisuisa nuannarinngilaat.

- Misigisimavugut tamatta anniarluta aliasullutalu. Kinami taamaassannginnami? Allaanngilagut nunarsuarmi illaruaatigineqarluta, Canadami nunap immikkoortuani Saskatchewanimi Sovereign Indigenous Nationsip aqutsisuat, Bobby Cameron nunap inoqqaavi assigiinngitsut sinnerlugit oqarpoq.

- Suliniaqatigiiffitta Canadap inoqqaavinut taamanikkut iliuuserisarsimasai ajuusaarutigeqaakka. Utoqqatserpugut. sooruna taama oqarnissani tunuarsimaarutigigaa, Canadami nunap immikkoortuani Saskatchewanimi Sovereign Indigenous Nationsip aqutsisuat, Bobby Cameron nunap inoqqaavi assigiinngitsut sinnerlugit oqarpoq.

Canadap immikkoortuani British Columbiami meeqqat 215-it saarngi Kamloops Indian Residential Schooliusimasup eqqaani nassaarineqarput.