Canadamit ilanngutassiortoq meeqqat saarngisa nassaarineqarnerat pillugu: Eqqortumik utoqqatseqqusisoqarpoq
Canadap oqaluttuarisaanerani amiilaarnartumik sapaatit akunnerata siuliani saqqummertoqarpoq.
Canadami British Colombiami nunap inoqqaavisa atuarfigiitigalugu najugaqarfigisimasaata eqqaani meeqqat 215-it saarngi nassaarineqarput.
Meeqqat ilaat pingasunik ukioqarlutik toqusimapput, timaannillu nassaarneq nunap innuttaasuinit tupassutigineqaqaaq.
KNR-ip Canadami Montrealimi ilanngutassiortua Marianne Stenbæk qanittukkut oqaloqatigaa, taassuma Canadami qisuariarnerit qanoq innersut aamma nassaartoqarnerata kinguneri oqaluttuarai.
Assi: Marianne Stenbæk.
- Aallaqqaammut upperiuminaatsinneqarpoq, kinguninnguali qisuariarnerit sakkortupput. Canadap annersaani erfalasut qiteqqunneqarput, akerliussutsimik takutitsisoqarpoq sumiiffinnilu amerlasuuni meerarpassuit peerunnikkut ersersinniarlugit kamippannik ilioraasoqarpoq.
AAMMA ATUARUK Canadami nunap inoqqaavi inuit timaannik nassaareernerup kingorna akissutissaserusuttut
- Canadami siullersaalluni ministeriunerusimasup John McDonaldip Montrealimi eqqaassutissiaa peerneqarpoq, taassumami Canadami najugaqarfigiitigalugit atuarfiusut aallartippai. Torontomilu ilisimatusarfiup Ryerson Universityp atia allanngortinneqarpoq, X Universitymik ateqalerluni.
Utoqqatseqqusisut
Canadami nunap inoqqaavisa ilaat Tkemplusps te secwelpemcikkut atuarfinni taamaattunni Canadami annersaajusimasup Kamloops Indian Residential Schoolip eqqaani nassaarsimallutik sisamanngormat nalunaartuupput.
Atuarfiit taamaattut nunap inoqqaavisa meerartaannut immikkut atuarfiusimapput. Atuartut kinaassutsiminnik ileqquminnillu atuiunnaarlutik, kitaamiut inooriaasiannut tulluarsarnissaat siunertaavoq.
Atuarfiit taamaattut Canadami immikkut aaqqissuussinermut ilaapput, atuarfiillu meeqqat angajoqqaaminniit pinngitsaalisaallutik arsaagaallutik najugaqarfigisagaat ukiuni 1831-miit 1996-ip tungaanut ingerlapput.
AAMMA ATUARUK Ilisimatooq: Canadami meeqqat saarngini amerlanernik nassaassaqarpoq
Atuarfinni taakkunani atornerluisoqartarsimasoq, peqqinnanngitsumik nerisitsisoqartarsimasoq atuarfinnilu kinguaassiuutitigut pinngitsaaliisoqartarsimasoq, misissuinissamut ataatsimiititaliarsuup 2015-mi misissuinermini paasivaa, Ritzauillu allaaserisaa naapertorlugu, aaqqissuussaq inuiaat kulturiannik nungusaanertut taallugu.
Politikkikkut maanna susoqarpa?
- Canadami inatsisartuni ilaasortat immikkut ittumik aggersarneqarput oqallitsinneqarlutillu, susoqartariaqartorlu tamarmiullutik kiisami isumaqatigiipput, Marianne Stenbæk oqarpoq.
- Canadami Ilumoortussaq Saammaasseqatigiinnissarlu pillugit Isumalioqatigiissitami siulittaasuusimasoq Murray Sinclair siullermeerluni oqaaseqarpoq, taassuma pisimasut amiilaarnartut oqaluttuarai. Assersuutigalugu atuarfiit ilaanni palasit niviarsiaqqanik kinguaassiuutaasigut pinngitsaalisarsisut, ernigaangatalu meerartaavi kissarsuutinut iginneqartartut ikuallallutillu toqusartut oqaluttuarai.
Canadami Ilumoortussaq Saammaasseqatigiinnissarlu pillugit Isumalioqatigiissitami siulittaasuusimasoq Murray Sinclair siullermeerluni oqaaseqarpoq, taassuma pisimasut amiilaarnartut oqaluttuarai. Assersuutigalugu atuarfiit ilaanni palasit niviarsiaqqanik kinguaassiuutaasigut pinngitsaalisarsimagaat, ernigaangatalu meerartaavi kissarsuutinut iginneqartartut ikuallallutillu toqusartut.
Najugaqarfigiitigalugit atuarfiit Canadami naalakkersuisut katuullit suleqatigalugit ingerlanneqarput. Ilagiit katuullit mattuttut Kamloopsimi suleqatigineqarput, tamannalu pillugu biskoppit, pingaartumillu paavip utoqqatsissuteqarnissaat maanna piumasarineqalerpoq.
Utoqqatserumanngillalli.
Biskoppit pisimasut ajuusaarutigalugit oqaatigaat, ajuusarinninnermilli oqaatsit naammanngitsut inuit allat oqaatigaat. Utoqqatsertoqarnissaa piumasaraat, allaallumi iliuuseqartoqarnissaa ujartorneqarluni. Najugaqarfigiitigalugit atuarfiit 139-t eqqaat misissorneqarnissaat, Canadami inatsisartuni ippassaq isumaqatigiissutigineqarpoq.
