Canadami nunap inoqqaavisa meerartaasa iliverpassuinik suli nassaartoqartartoq
- Iliverpassuit Canadami 2021-mi aasakkut nassaarineqarmata quarsaarutigineqarput, meeqqammi iliverpassuinik nassaartoqarami. Meeqqallu ilivii 2000-t missaanniittut maanna aamma nassaarineqarsimasut sapaatit-akunnerata siuliani nalunaarutigineqarpoq.
Meeqqat ilivii, Canadami nunap immikkoortuani Saskatchewanimi ineqarfiutigalugu atuarfiup Qu'Appellep eqqaani nassaarineqartut Marianne Stenbækip oqaatigaa.
AAMMA ATUARUK Canadami nunap inoqqaavi inuit timaannik nassaareernerup kingorna akissutissaserusuttut
Nassaarfiup nalaa timmisartumik radarilikkamik qulaavaaneqarpoq, nunap iluani soqarnersoq radarip takusinnaavaa. Timmisartoq qulaavaammat radari 2000-eriarluni malussarpoq, tassa ujaqqanik, orpiup sorlaanik iliviusinnaasumilluunniit malussarsinnaalluni.
Meeqqap allerua nassaarineqarmat pinerluttoqarsimasinnaanera pasitsaanneqartoq
KNR-ip Canadamit tudsagassiisartua Marianne Stenbæk, ineqarfigiitigalugu atuarfiit eqqaanni iliviit nassaarineqarnerisa oqaluttuarisaanerannik malinnaasoq.
Radarip malugisinnaasaasa 2000-t akornanni iliveqarsinnaanera ilimagineqarpoq, inuummi alleruata ukiunik 125-nik pisoqaassusilik tamaani siusinnerusukkut nassaarineqarnikuummat. Alleqqup pineqartup meeqqap sisamat arfinillillu akornanni ukioqartuusimaneersuunissaa kingorna paasineqarpoq:
- Meeqqat tassanngaannartumik tammartut, atuartuusimasut sapaatit-akunnerata siuliani katersuunnermi ilaatigut oqaluttuaraat, niviarsiaqqallu palasinit pinngitsaalillugit arneriffigineqarnermi kingorna naartulersimappata naalungiarsuit ikuallanneqartartut aamma oqaluttuaralugu. Canadap oqaluttuarisaanerani pisimasut quarsaarutigineqartut ilaat, Marianne Stenbæk oqarpoq.
Meeqqat ineqarfiutigalugu atuarfigisimasaata Qu'Appellep eqqaani iliviit 2000-t saniatigut, Canadami nunap immikkoortuini allani iliviit 1200-1300-t misssaat aamma nassaarineqarsimapput.
Saammaateqatigiinniarneq sivisunaanartoq aallartittoq
Métisit, naggueqatigiillu Inuit 150.000-t missaat ilaquttaminnit arsaagaallutik ineqarfigiitigalugit atuarfinnut, ilagiit katuullinit amerlanertigut aqunneqartunut, 1998 tikillugu inissinneqartarsimapput. Ataatsimiititaliarsuup misissuitinneqartup tamanna kulturikkut toqoraanertut 2015-imi taavaa.
Meeqqat ilaquttaminnit peerneqarlutik inissinneqartut, nunat killiit inooriaasiannut, Canadami maanna atorneqartumut naleqqussarneqarnissaat siunertaasimavoq.
AAMMA ATUARUK Pave Francis oqarpoq Canadami nunap inoqqaavisa kulturiannik nungutitseriartoqarsimasoq
Iliverpassuit nassaarineqartut pissutaallutik Canadami innuttaasut anngiiaqatigiittariaqarsimapput, nunallu inoqqaavinik assigiinngisitsisarsimanerit pillugu Canadami meeqqat atuarfiini atuartitsisoqartalersimalluni. Canadami nunap inoqqaavisa tamanna ukiorpassuarni piumasarisimavaat.
- Inuit tamanna maanna eqqumaffigisorujussuuaat, saammaateqatigiiinnissarlu pillugu suliniuterpassuaqarpoq, kigaatsumilli tamanna ingerlavoq, Marianne Stenbæk oqaluttuarpoq.
Ineqarfigiitigalugit atuarfiusimasut eqqaanni suli iliveqarsinnaanersoq, ukiorpassuit tulliuttut ingerlaneranni suli misissorneqartarumaartoq taassuma ilanngullugu oqaluttuaraa.
