Canadami politiit savilersorluni toqoraanermi pasineqartup timaa nassaarigaat
Canadami politiit sapaammi inuit qulit toqutaaffigisaanni savilersortoqarneranit pasineqartunit angutinit marlunnit aappaata timaa nassaaraat.
Savilersorneq Canadami nunap immikkoortuani Saskatchewanimi nunaqarfimmi, James Smith Cree Nationimi pivoq.
Pasineqartup timaani ersarissunik ikeqarpoq, politiillu angut imminut ikilersimasorinngilaat. Saskatchewanimi politiit pisortaat, Rhonda Blackmore Canadami ataasinngornermi ualikkut tusagassiortunik katersortitsinermi paasissutissiivoq.
Toqungasup timaa James Smith Cree Nationimi nassaarineqarpoq.
18-it ikilerneqartut
Savimmik saassussisoqarnerani inuit 18-it ikilerneqarput. Saassussinerup kingorna pasineqartut marluk suli tigusarineqanngitsut politiillu taakkuninnga tigusarinninniarlutik isumalluuterpassuarminnik sulisitsisut oqaatigineqarpoq.
Pasineqartut qatanngutigiittut politiit uppernarsarpaat.
AAMMA ATUARUK Canadami inuit qulit savilersortoqarnerani toqutaasut
Pasineqartup aappaa suli tigusarineqanngitsoq politiit paasissutissiipput, pasineqartorlu illoqarfimmi Reginamiissangatippaat.
Angut ikilersimasinnaasoq politiit “ilimagilluinnarpaat”.
Pineqartup “pillagaasimanermut allagartaani allassimasorpassuullutillu annertusut”, politiit paasissutissiipput.
- Pasineqartup ulorianartuullunilu sakkulisartuunissaa qularutissaqartinngilarput. Attaviginasiuk, Rhonda Blackmore oqarpoq.
Aatsaat taama sakkortutigisoq
Illoqarfik Regina savilersorfiusumit James Smith Cree Nationimit 300 kilometerinik ungasitsigisumiippoq.
James Smith Cree Nation nunaqarfiuvoq Canadami nunap inoqqaavineersunik 3400-nik innuttaasoqartoq.
Canadami politiit sapaammi ullaakkut savilersortoqarneranik nalunaarfigineqarput.
Savilersortoqarnerani meeqqanik meeraaqqanilluunniit ajoqusertoqarsimanersoq politiit ilisimanagu ataasinngornermi ualikkut paasissutissiissutigaat.
Savilersortoqarnera Canadap oqaluttuarisaanerani piffimmi nutaajunerusumi aatsaat taama sakkortutigivoq. Pinerliffigineqartut ilaat taamungaannaq saassunneqarsimasut pinerluuteqartulli aalajangersimasunik aamma saassussisimasut politiit oqaatigaat.
