USA-mi inunnik pingasunik toqutsilluni aallaasersortoq innuttaasumit aallaaneqarluni toqutaasoq

Amerikap ilaani Indianami pisiniarfissuit ilaanni ippassaq sapaammi eqqaassisoqaleriataarnera inuit sisamat inuunerannik naleqarpoq.

Angut pisiniarfissuarmi eqqaassileraluarpoq inuillu pingasut eqqorlugit toquppai marlullu ikilerlugit, angulli alla nalaatsortumik aallaammik nassataqarsimavoq, eqqaassileraluartorlu aallaallugu toqussimavaa.

- Ullormi tassani innuttaasutut angut taanna sapiitsuliorpoq, taanna akuerisaasumik neriniartarfup nalaani aallaaseqarsimavoq, sukkasuumik aallaasersuleraluaqisoq sukkaqataanik aallaasimavaa aallaasersuleraluarneranillu taamaalillugu unitsillugu, USA-mi politiit ilaat Ison taama issuarneqarpoq.

Aallaasersortoq kisimiilluni aallaasersorsimavoq assullu imassaateqarsimagaluarluni.

Tusarfinnit tutsuiginartunit oqaatigineqarpoq, inuppassuarnik taamatut eqqaassileriataarnerit pissutaallutik 2022-mi inuit 300-t sinneqataangaatsiartut maannamut toqutaasimasut, matumani kisitsinermi eqqaassisut toqunneqarneri ilanngunneqanngillat.

AAMMA ATUARUK Chicagomi inuit arfinillit ingerlaaqatigiit ilaannut aallaasersortoqarnerani toqutaasut

Ukioq manna USA-mi eqqaassinerit maluginiarneqarnerpaat ilagaat Texasimi atuarfimmi Uvaldemi eqqaassisoqarnera, tassanimi 19-nik ukiulik eqqaassileriasaarmat meeqqat 19-t ilinniartitsisullu marluk toqunneqarput.

Taamatuttaaq New Yorkip ilaani Buffalomi eqqaassisoqarnerani inuit qulit toqunneqarput.

Aasaq mannalu junimi amerikami Senatip ukiut 28-t ingerlaneranni aatsaat siullerpaamik aallaaseqarsinnaatitaanermut inatsit allanngortippaa.

Inatsisillu taassuma ilaatigut imaraa, inuit aallaammik pisilerneranni inuttut tunuliaqutaat misissorneqaqqaartassasoq, matumani maluginiarneqartussaallutik aallaasisiniat angerlarsimaffimmi nakuuserfiusumeernersut aammalu inuusuttutut pinerlunniatut eqqartuussaasimanersoq.