Danmarkimi inuit coronamik toqqutillit suli peqqikkaluarunik ukiorpassuarni suli inuusimasinnaagunaraluartut

Danmarkimi inuppassuit coronavirusimik toqquteqarnikuupput.

Danmarkimimi inuit nappaammik taassuminnga toqquteqartut suli peqqikkaluarunik ukiorpassuarni suli inuusimasinnaagunaranaraluartut, Danmarks Tekniske Universitetip (DTU) naalagaaffiullu nappaatinik nakkutilliisoqarfiata Statens Serum Institutip (SSI) misissuinerisa takutippaat.

Tassa Danmarkimi inuit coronavirusip tuniluutileqqaarnerani nappaammik taassuminnga taamanikkut toqqutillit 2383-iusut suli peqqikkaluarunik tamarmik ukiuni katillutik 30.000-ni suli inuusimasinnaagunaraluartut misissuinerup takutippaa. Allatulluunniit oqaatigalugu: Inuk ataaseq nappaammik taassuminnga toqquteqartoq suli peqqikkaluaruni agguaqatigiisillugu ukiuni 13-ini suli inuusimasinnaagunaraluarpoq.

AAMMA ATUARUK Danmarkimik omikronimik toquteqartut marluk siulliit nalunaarsorneqartut

Danmarkimi inuit coronavirusimut PCR-test atorlugu ukiumi siullermi misissorneqarsimasut 211.000-nit amerlanerulaartut, misissuinermit kisitsisini erserpoq, inuillu tassa 2383-it nappaat taamanikkut toqqutigalugu.

Misissuinermit kisitsisit coronavirusip qanoq tuniluussimatigineranik ersersitsisut, Statens Serum Institutimi ilisimatusartuuneq Steen Ethelberg isumaqarpoq. Coronavirusimmi nappaatinit allaninngarnit qanoq tuniluutiatigineruneranik nunanilu allani qanoq tuniluussimatigineranik taamaalilluni sanilliussisoqarsinnaalissammat.