Danmarkimik omikronimik toquteqartut marluk siulliit nalunaarsorneqartut

Coronavirusip allannguutaanik Omikronimik tunillanneqarsimasut nappaat toqqutigisimagaat, Naalagaaffiup Nappaatinut Nakkutilliisoqarfiata, Statens Serum Institutip, nalunaarusiaani takuneqarsinnaavoq . Omikron Danmarkimi novembarip naalernerani tuniluutilerpoq.

Inuit Omikronimik tunillanneqarsimasut 18-it novembarip ulluisa 21-ata 28-atalu akornanni toqupput. Taakku Omikronimik tunillanneqarsimasut 55.691-it akornanniipput.

Tunillatsissimasutut paasineqarnermi kingorna ullut 30-t ingerlaneranni toqusoqarpat coronavirusimik napparsimalluni toqquteqartutut nalunaarsorneqarsinnaavoq.

AAMMA ATUARUK Coronamut misissukkat aatsaat taama amerlatigisut akissutisinissaq sivisunerutikkaat

Omikronimit toqquteqartut, coronavirusimit maannamut toqquteqartut affaasa missaraat, Omikronili nutaajummat paasissutissat suli killeqarput.

Omikronimilli tunillatsissimagaanni coronavirusip allannguutaanut Deltamut naleqqiullugu napparsimmavimmut unitsitaanissaq aarlerinannginnerugunartoq, Statens Serum Institutimi immikkoortortami pisortap Tyra Grove Krausep ippassaq ataasinngornermi oqaatigaa.

Omikron nunatsinni pisortatigoortumik suli nassaarineqanngilaq, Omikronilli nunatsinnut anngussimanera qularutissaanngitsoq, nunatta nakorsaanerata Henrik L. Hansenip KNR-imut sapaatit-akunnerata siuliani oqaatigaa.
- Nappaatip sukkasuumik tunillaassuutilernerata ersarissumik takutippaa, maanna tuniluuttoq siornatigut takusariikkatsinnit sukkanerusumik tuniluuttoq, Henrik L. Hansen KNR-imut sapaatit-akunnerata siuliani nassuiaavoq. 

Inuit 604-t coronavirusimik nunatsinni maanna tunillatseqqapput.