Coronamut misissukkat aatsaat taama amerlatigisut akissutisinissaq sivisunerutikkaat

Coronavirusimik tunillatsittoqarsimanissaannik misissuisut ulapittorujussuupput. Taamaammat misissortinnermit akissutisinissaq nalinginnaasumit sivisuneruvoq, oqartussallu tunillatsissimasunut qanillisimasunut tamanut sianertarunnaarput.

Allattoq Mathies Hvid Toft

decembarip 31-at 2021 13:27

Nutserisoq Ivik Kristiansen

Covid-19-imik tunillanneqarsimasutut paasineqaruit qanillisimasatit nammineerlutit sianerfigissavatit.

Nunatsinni Nakorsaaneqarfik taama paasissutissiivoq.

Tuniluunnerit aallaaviinik paasiniaasut tunillanneqarsimasunik aatsaat taama amerlatigisunik paasisaqartoqarnera pissutigalugu ulaperujussuarnerat tamatumunnga pissutaavoq.

- Taamaammat innuttaasut tunillatsissimasut ikiuunnissaat pisariaqartinneqarpoq, tunillatsissimasut qanilisimasaminnut paasititsinissaat pisariaqartinneqarmat, Nunatsinni Nakorsaaneqarfik nalunaarummi allappoq.

AAMMA ATUARUK Corona pillugu ullumi kisitsisit: Tunillatsittut nutaat 95-it

Tuniluunnerit aallaaviinik paasiniaasunit sianerfigineqarnissat utaqqeqqaarnagu qanillisimasatit piaartumik sianerfigissagitit pingaaruteqarpoq. Aamma sulisitsisutit tunillanneqarsimanernik nalunaarfigissavatit.

- Sulisitsisutit suliffinni qanillisimasatit naninissaat suliaralugu aallatissavaat, Nunatsinni Nakorsaaneqarfik allappoq.

Nakorsaaneqarfiup coronavirusimik tunillanneqarsimasunut qanillisimasunut maleruagassat aamma erseqqissaassutigai.

Qanillisimasat akiuussuserneqarsimanngippat ingerlaannaq mattutissaaq qanillineqarsimanermiillu ullut arfineq-aappassaani misissorneqassalluni.
Qanillisimasat akiuussuserneqarsimappat ersiuteqarnanilu, taava mattusimasariaqanngilaq, taamaattorli qanillineqarsimanermiit ullut sisamassaanni kiisalu ullut arfineq-aappassaanni misissortissaaq.

Misissukkat aatsaat taama amerlatigisut

Coronavirusimik tunillanneqarsimasutit ulluni kingullerni paasineqarsimaguni naammagittalaartariaqassaatit.

Inuimmi decembarip ulluisa 29-anni 30-annillu misissortittut aatsaat taama amerlatigimmata, oqartussat angummannaveerput.

- Misissukkat misissoqqissaarlugit ulloq unnuarlu sulisoqarpoq, taamaattorli ulluni makkunani akissuteqaammik nalunaarfigineqarnissap pisarnermiit sivisunerunissaa naatsorsuutigineqartariaqarpoq. Misissugaq negativiutillugu SMS-ikkut nalunaarutigineqartarumaarpoq, Nunatsinni Nakorsaaneqarfik allappoq.

AAMMA ATUARUK Killilersuutit Kangerlussuarmi atuutilersut

Coronavirusimik tunillanneqarsimasut nunatsinniittut aatsaat taama amerlatigipput. Nuna tamakkerlugu 406-it maanna tunillatseqqapput. Taakkunani Nuummiittut Kommuneqarfik Sermersuullu sinneraniittut amerlanerpaapput.

Tunillatseqqasut kommunimiittut 359-iupput, illoqarfiillu pingaarnersaanni inuit 75-it tunillanneqarsimasutut sisamanngormat paasineqarlutik.

Nutaarsiassami kukkunermik nassaarsimaguit uunga allaffigineqarsinnaavugut.