Corona pillugu ullumi kisitsisit: Tunillatsittut nutaat 95-it
Ullup kingulliup ingerlanerani tunillatsissimasut nutaat 95-iusut Nakorsaaneqarfik nalunaarpoq.
Taakkunannga 75-it Nuummi nassaarineqarput.
Nunatsinni tamani maanna tunillatsissimasut 406-iupput.
Nuummi misissortittut akornanni tunillatsissimasut suli amerlapput – 8,7 procentiullutik.
Illoqarfiit nunaqarfiillu coronaqarfittut nalunaarsukkanut aamma maanna Kangerlussuaq ilannguppoq: Tassani aqqaneq-marluk tunillatsissimasut paasineqarpoq.
Qasigiannguani misissortittut 28-t akornanni tunillatsissimasut marluk paasineqarput – Nakorsaaneqarfimmiillu nalunaarutigineqarpoq illoqarfimmi tunillaassuunneq annikilliartortoq.
Aasianni tunillatsissimasut nutaat tallimat nassaarineqarput.
Pituffimmi aamma tunillatsissimasoq nutaaq ataaseq paasineqarpoq.
Covid-19 pissutigalugu napparsimmavinni uninngasut katillutik pingasuupput: Sismiuni ataaseq, Nuummi ataaseq kiisalu Qaqortumi ataaseq.
Naatsorsueqqissaarnermi nalunaarsuinerup nalaani suli napparsimallutik uninngasut ilanngunneqarput.
Napparsimasut uninnganermi nalaanni peqqissisut naatsorsueqqissaarnermi ilanngunneqartanngillat.
Tunillatsittut kommuunikkaarlugit immikkoortiterneri imatut isikkoqarput:
- Avannaata Kommunia: Arfineq-marluk
- Kommune Qeqertalik: 18-it
- Qeqqata Kommunia: 18-it
- Kommuneqarfik Sermersooq: 359-it
- Kommune Kujalleq: Sisamat
Maannakkut inuussuttut akornanni tuniluuttoqarnerulerpoq. Nakorsaaneq Henrik L. Hansen ippassaq nun.gl aqqutigalugu imatut nalunaarpoq:
- 26.decembarimiit misissortittut akorngini tunillatsissimasut ukiui agguaqatigiissillugit 29-nik ukioqarput.
- Tunillatsissimasut tamarmik 33 procentii 18-it inorlugit ukioqarput.
- Inuusuttut 18-it 29-illu akorngini ukiullit tunillatsissimasut 16 procenteraat.
- 30-niit 49-nut ukiullit tunillatsissimasut 32 procenteraat kiisalu sinneri 18 procentit 50-it sinnerlugit ukioqarlutik.
Tunillatsissimasut amerlassusaat pissutigalugu nakorsaanerup peqqinnissamullu naalakkersuisup Kirsten Fencker-ip (Naleraq) inassutigaat ikittuinnaalluni ukiortaarsiornissaq.
- Najugaqatitit ulluinnarnilu ilagisartakkatit kisiisa ilagalugit ukiortaarsioqatigikkit, taamatut taakkua inassuteqarput.
