Corona pillugu ullumikkut kisitsisit: Illoqarfinni pingasuni tuniluunneq annikilliartortoq
PCR-imik misissuinernit 108-nit 23-nnaat tunillatsissimasuupput.
Tunillatsissimasut paasineqartut januaarimili 50 procentiisa missaanniiginnavissimagaluarpoq. Tuniluunnerup annikilliartorneranut takussutissaqarpoq.
Misissuisarnermut periuseq nutaaq
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq.
Nakorsaaneqarfiup oqarnera naapertorlugu Nuummi, Ilulissani Aasiannilu tuniluunneq annikilliartortutut nalilerneqarpoq, Sisimiuni, Maniitsumi, Uummannami, Paamiuni nunattalu kujataani tuniluunneq suli annertuvoq.
Tasiilami tunillatsissimasunik paasisaqartoqartoq nakorsaaneqarfiup aamma allappaa, Ittoqqortoormiinilu Qaanaamilu suli tunillatsissimasoqanngilaq.
AAMMA ATUARUK Corona pillugu ullumikkut kisitsisit: Coronamik tunillatsissimasut 14-it uninngasut
PCR-imik misissukkat tunillatsissimasukinnerusoq takutikkaluaraat, nunatsinni napparsimmavinni suli uninngasoqarpoq.
Uninngasut atasinngornermi 14-iusut ullumikkut katillugit 15-iupput.
Nakorsaaneqarfiup inuit sisamat nutaat napparsimmavimmut unitsinneqartut allappaa - taakkunannga marluk Ilulissaniipput, ataaseq Nuummi ataaserlu Aasianni. Nuummi, Paamiuni Nanortalimmi napparsimmavimmi uninngasut pingasut ataasinngornerup kingorna angerlartinneqarput.
Nuummi arfinillit, Ilulissani pingasut, Paamiuni ataaseq, Sisimiuni marluk, Uummannami ataaseq, Qaqortumi ataaseq Aasiannilu ataaseq napparsimmavimmi uninngapput.
Taakkunannga marluk coronamik pingaarnertut pissuteqarlutik uninngapput. Uninngasunit ataaseq peruluttut uninngavianniittoq nakorsaaneqarfiup ataasinngornermi oqaatigaa, ullumikkullu nutaamik peruluttut uningaviannut unitsitsisoqarsimanerarlugu.
Uninngasunit sisamat nappaat alla pissutigalugu uninngapput, coronamilli tunillatsissimanerat napparsimanerannut aamma sunniuteqaqataalluni.
Uninngasunit qulingiluat allamik pissuteqartumik uninngapput, coronamillu tunillatsissimanerat sunniuteqarnani.
