Corona pillugu ullumikkut kisitsisit: Pingasunngormalli tunillatsittut nutaat 591-it
Pingasunngornermit ullumikkumut tunillatsissimasut nutaat 591-it paasineqarput.
Ullup ataatsip kingulliup ingerlanerani paasineqartut 222-usut, Nakorsaaneqarfik nalunaaruteqarpoq.
Teknikikkut ajutooqqaneq pissutigalugu tunillatsissimasut nutaat ippassaq saqqummiunneqanngillat.
Nunatsinni tunillatsissimasut maanna 1.241-lersut aatsaat taama amerlatigipput.
Killilersuutit nutaat
Coronapasimik takutitsisinnaanissamik piumasaqaat unnuap qeqqaniit illoqarfinni nunaqarfinnilu tuniluuffiup aallaaviata ilisimaneqannginneranik ulluni 14-ini kingullerni tunillatsittoqarfiusuni atuutissaaq.
Illoqarfiit nunaqarfiillu aqqi Nakorsaaneqarfiup nittartagaani, nun.gl-imi saqqummersinneqassapput.
Illoqarfik nunaqarfilluunniit allattorsimaffinnut ilanngunneqaruni, taava killilersuutit pingasut atuutilertassapput:
- Coronapasimik takutitsisinissamut piumasaqaat
- Tamanit ornigarneqarsinnaasuni isersimasinnaasut amerlanerpaaffissalernerat - tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.
- Sumiiffinni tamani tamanut iserfigineqarsinnaasuni qanermut assiaquteqarneq.
Annertuumik suli tuniluuttoqarpoq, pingaartumik illoqarfinni annerusuni. Illoqarfinnili minnerusuni nunaqarfinnilu aamma coronamik maanna tuniluuttoqartoq, Nakorsaaneqarfik paasissutissiivoq.
Tunillatsissimasut nutaat sumiiffinni aqqaneq-marlunni ukunani paasineqarput:
- Upernavimmi ataaseq
- Ilulissani 35-t
- Uummannami ataaseq
- Qasigiannguani tallimat
- Aasianni marluk
- Sisimiuni aqqaneq-marluk
- Kangerlussuarmi tallimat
- Maniitsumi tallimat
- Nuummi 498-it
- Narsami 21-t
- Qaqortumi sisamat
- Eqalugaarsunni marluk
Inuit sisamat napparsimmavimmi suli uninngapput. Ilulissani ataaseq Nuummilu pingasut. Nuummiittoq ataaseq peruluttut uninngavianniippoq.
Tunillatsissimasut amerlassusaat kommunikkaarlugit agguataarnerat imaapput:
- Avannaata Kommunia: 101
- Kommune Qeqertlik: 10
- Qeqqata Kommunia: 57
- Kommuneqarfik Sermersooq: 1.042
- Kommune Kujalleq: 31
Tunillatsissimasoqangaatsiaqattaarnera pissutigalugu misissuinermi akissutit inernerannik akissutissiinissaq sivisuneruvoq.
AAMMA ATUARUK Lena Ilulissani coronamut misisissortikkusuppoq: Immaqa 400-riarluta sianerpugut
- Ullormut misissortinnerpassuit akunnerit 24-t iluanni akissutersineqarnissaat naatsorsuutigineqarsinnaanngilaq. Tamatuma saniatigut tunillatsittut procentiata qaffasinnerunera pissutigalugu misissugassaq misissuiffigeqqissaarnerat sivisuneruvoq. Misissuisarfiup misissugassanit tigusineranit akunnerit 48-t tikillugit akissutersiniarsinnaagaat, nakorsaaneqarfik nalunaaruteqarpoq.
Pisiniarfiit
Allakkeriviit.
Mittarfiit
Pisortatut oqartussani pilersuiffiusunilu init sullissiviit, saaffiginnittarfiit il.il.
Pisortat angallassissutaannut tunngatillugit utaqqisarfiit.
Corona pillugu killilersuutit marlunngormat allanngortinneqarput.
Illoqarfinni nunaqarfinnilu sapaatini akunnerni marlunni kingullerni coronamik tuniluunnerup aallaavia ilisimaneqarani tunillatsittoqarpat coronapasimik takutitsisinnaaneq taamaallaat atuutissaaq.
Tamanna siullermik nunatsinnut tamarmut atuukkaluarpoq.
Tamatumalu saniatigut nutaamik malittarisassaqalerpoq. Illoqarfinni nunaqarfinnilu tuniluuffiusuni neriniartarfiit imerniartarfiillu inoqarsinnaassutsimut qatserisartut akuerisaasa affaannaat kisimik isertissinnaalerpaat.
Coronapasimik takutitsisinnaanerup saniatigut tamanit iserfigineqarsinnaasuni qanermut assiaquteqarnissaq piumasaqaataavoq. Tamanna bussini taxanilu aamma atuuppoq.
Sumiiffiit maanna killilersuiffiusut tassaapput: Maniitsoq, Ilulissat, Kangerlussuaq, Nuuk, Qasigiannguit, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq og Kullorsuaq.
