Lena Ilulissani coronamut misisissortikkusuppoq: Immaqa 400-riarluta sianerpugut
Ilulissani inuit 300-nit ikinnerunngitsut ulluni kingullerni ullormut misissortittarput.
Misissuisarfimmilli ornigutiinnarfiusinnaasumik soqanngilaq - sianeqqaarluni piffissamik inniminniisoqassaaq. Oqarasuaalli nalunaaqutaq ullaakkut qulingiluanit ualikkut marluk tungaanut sianerfissaq iluatsikkuminaatsorujussuuvoq. Taamaammat inuit piffissamik inniminniisimanngikkaluartut napparsimmaviup silataanut siuleriiaattarput, siuleriiaattut taamaalillutik amerlangaatsiartarput.
Ilulissani oqarasuaammut 943211-mut ulluinnarni nalunaaqutaq ullaakkut qulingiluanit marluk tungaanut sianissaatit.
Lena Ravn Davidsen siuleriiaattorpassuarniillunilu piffissamik inniminniiniarsimasut ilagaat.
- Piffissamik inniminniiffissanngormat mobilit marluk atorlugit sianeqattaarpugut. Katillugit immaqa 400-riarluta sianereerluta aatsaat iluatsipparput.
Ernera tuniluuffiungaatsiartumiissimasoq
Taanna uinilu ernermi juullikkut nalaani tuniluuffiungaatsialersumi timersornikkut aaqqissuussisoqarnerani peqataanerata kingunerisaanik misissortikkusupput. Ukiortaami imerniartarfimmi timersornikkullu aaqqissuussisoqarnerata kingunerisaanik tuniluuttoqangaatsialernera pissutigalugu tunillatsittut positivprocentinngorlugit 25-miipput.
Assi: Lena Ravn Davidsen
Tassa imaappoq Ilulissani inuit misissortittut sisamaagaangata ataaseq covid-19-imik tunillatsissimasarpoq.
Taakku ernerata piffissamik inniminniiniarnera ajunnginnerulaarpoq.
AAMMA ATUARUK Tamaat isigalugu: Coronavirus pillugu killiffik
- Ernerput januaarip pingajuani misissortinnialermat piffissamik inniminneeqqaartussaagatta nalunaaquttap akunnera ataaseq sinnerlugu inniminniissunniarsarivarput. Qujanartumik iluatsillugu, taava nalunaaquttap akunneri marluk issersuup ataani utaqqilluni misissortippoq, Lena Ravn Davidsen oqarpoq.
- Illup iluaniiffeqarsinnaavugut tupeerannguup iluani immaqa minutsit 20-it missani, utaqqinermi 2 time sinnerlugu sivisussusilimmi.
Nunap immikkoortuani nakorsaaneq: Piffissamik inniminniisimanngikkuit siuleriiaattunukarnak
Napparsimmavillu siuleriiaattorpassuarnut atatillugu qanoq iliorniarpa? Nunap immikkoortuani nakorsaanerup, Peter Vedstedip oqarnera naapertorlugu piffissamik inniminniisimanngitsut siuleriiaattunukassanngillat.
Napparsimmavimmi unammillernartorsiungaatsiarpoq.
Killilersuutit nutaat
Coronapasimik takutitsisinnaanissamik piumasaqaat unnuap qeqqaniit illoqarfinni nunaqarfinnilu tuniluuffiup aallaaviata ilisimaneqannginneranik ulluni 14-ini kingullerni tunillatsittoqarfiusuni atuutissaaq.
Illoqarfiit nunaqarfiillu aqqi Nakorsaaneqarfiup nittartagaani, nun.gl-imi saqqummersinneqassapput.
Illoqarfik nunaqarfilluunniit allattorsimaffinnut ilanngunneqaruni, taava killilersuutit pingasut atuutilertassapput:
- Coronapasimik takutitsisinissamut piumasaqaat
- Tamanit ornigarneqarsinnaasuni isersimasinnaasut amerlanerpaaffissalernerat - tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.
- Sumiiffinni tamani tamanut iserfigineqarsinnaasuni qanermut assiaquteqarneq.
- Piffissamik inniminniisimanngitsut takkutiinnartut piffissamik inniminniinikut utaqqisariaqarnerannik kinguneqartitsisarput. Piffissamik inniminniisoqarnissaanut allamik aaqqiissutissarsiuleruttorpugut. Sapaatip akunnerata tullianit aallartinnissarput naatsorsuutigaarput, Peter Vedsted KNR-imut pingasunngornermi oqarpoq.
Taassuma inuit napparsimmaviup pinasuartumik oqarasuaataanut sianertassanngitsut piumaffigai, oqarasuaammulli ulluinnarni ullaakkut qulingiluanit ualikkut marluk tungaanut ammasartumut sianertaqqullugit.
- Pinasuartumik oqarasuaaterput sulisugullu napparsimasunut atugassaapput. Tunillatsissimasutullu akissutersisagut tamarmik sianerfigissavagut.
- Tunillatsissimanngitsut tamarmik SMS-ikkut akissutersisarput. Taamaammat uagutsinnut sianernissamut pissutissaqanngilaq. Tamannami suliassatsinnit allanit piffissaajaatigaarput. Inuit 60-it misissortinnissamut piffissamik pissarsiniarlutik sapaammi unnukkuinnaq sianerput. Taamaammat ambulancenut sianertoqarsinnaanani. Taava innuttaasut toquleraluarunik qanoq iliussappat?
Peter Vedstedip oqarnera naapertorlugu napparsimmaviup misissuisinnaanera sapaatip akunnerata tulliani annertunerulissaaq. Maskiinami misissuissut allaanerusoq atorlugu napparsimmaviup misissugassat amerlarnerusut nammineq misissorsinnaalissavai.
Ilulissani tuniluuttoqarnera pissutigalugu corona pillugu killilersuutit nutaat atuutilerput. Inuit sumiiffinnut tamanit iserfigineqarsinnaasunukarniarunik coronapasimik takutitsisinnaassapput aamma soorlu bussini, taxani qanermut assiaquteqassapput, kiisalu neriniartarfinni imerniartarfinnilu qatserisartut inoqarsinnaassusaatut akuerisaasa affaannaat kisimik isersimasinnaatitaallutik.
