Piffissamik inniminniinngitsut misissuineq kigaallatsippaat: Maannali allanngortitsisoqassaaq
Tunillatsissimasut ulluni kingullerni amerligaluttuinnarput – Ilulissallu sukkasuumik tuniluuttoqarfiusunut ilaavoq. Ilulissani tunillatsissimasut 35-t ulluni paasineqarput, ippassarlu 18-it paasineqarlutik.
Misissuisarfimmi nalinginnaanngitsumik aamma ulapputtoqarpoq: Misissugassatut ippassaq ullumilu tigusat 300-it missaanniipput. Avannaanilu nunap immikkoortuani nakorsaanerup, Per Vedstedip oqarnera naapertorlugu Ilulissani tunillatsittut amerlarsussaat 25 procentimiippoq. Tassa Ilulissani misissortittut sisamaagaangata ataaseq covid-19-imik tunillatsissimasarpoq.
Tamanna nakorsaanerup, Henrik L. Hansenip ippassaq tusagassiortunik katersortitsinermi saqqummiussaanit qaffasinneruvoq:
- Inuit tallimat misissortikkaangata ataaseq tunillanneqarsimasarpoq, maannalu tuniluunneq ingerlarsoqaaq. Maanna tuniluuffiusuni sivikitsuinnarmik qanillilaarsimasulluunniit tamarmik tunillanneqarsimasarput, nakorsaaneq ippassaq oqarpoq.
Ilulissani oqarasuaammut 943211-mut ulluinnarni nalunaaqutaq ullaakkut qulingiluanit marluk tungaanut sianissaatit.
Ilulissani tuniluuffiusumik pisoqarnerata kinguneranik tunillatsissimasorpassuaqarpoq, tassa: Juullip ukiortaallu akornanni Ilulissani timersornikkut aaqqissuussinermi ukiortaamilu imerniartarfimmi fistanneq tunillaassuipiloorfiupput.
- Tunillatsissimasunit amerlanerussuteqartut aaqqissuussinerit taakku pineqartut tunillatsiffigisinnaasamisut taasarmatigit tuniluuffiusutut takusinnaavagut, nunap immikooortuani nakorsaaneq, Per Vedsted KNR-imut oqarpoq.
Qanoq amerlatigisut aaqqissuussani tuniluuffiusuni taakkunani marlunni tunillatsissimappat?
- Piffissami matumani tamanna ilisimanngilara, pissutigalugu tunillatsissimasunik suli paasisaqartoqartarmat. Aamma misissortinnianngitsoqarpoq. Taakkuli amerlapput.
Assi: Lena Ravn Davidsen
Inuit napparsimmavimmut sianerlutik akissutissarsinissaminnik nukingisaarinnginnissaat kaammattuutigaarsi. Sooruna?
- Pinasuartumik oqarasuaaterput sulisullu napparsimasunut atugassaapput. Tunillatsissimasutullu akissutersisagut tamarmik sianerfigissavagut. Uanga nammineerlunga tunillatsissimasut tamarmik ataasinngornermi marlunnngornermilu sianerfigaakku ullumikkut aamma taamaaliorpunga. Oqaloqatigilluarpakka, inuillu suliaqarnermut nuannaarutigilluinnarpaat, Peter Vedsted oqarpoq.
- Tunillatsissimanngitsut tamarmik SMS-ikkut akissutersisarput. Taamaammat uagutsinnut sianernissamut pissutissaqanngilaq. Tamannami suliassatsinnit allanit piffissaajaatigaarput. Inuit 60-it misissortinnissamut piffissamik pissarsiniarlutik sapaammi unnukkuinnaq sianerput. Taamaammat ambulancenut sianertoqarsinnaanani. Taava innuttaasut toquleraluarunik qanoq iliussappat?
Peter Vedstedip oqarnera naapertorlugu napparsimmaviup misissuisinnaanera sapaatip akunnerata tulliani annertunerulissaaq. Maskiinami misissuissut allaanerusoq atorlugu napparsimmaviup misissugassat amerlarnerusut nammineq misissorsinnaalissavai.
Killilersuutit nutaat
Coronapasimik takutitsisinnaanissamik piumasaqaat unnuap qeqqaniit illoqarfinni nunaqarfinnilu tuniluuffiup aallaaviata ilisimaneqannginneranik ulluni 14-ini kingullerni tunillatsittoqarfiusuni atuutissaaq.
Illoqarfiit nunaqarfiillu aqqi Nakorsaaneqarfiup nittartagaani, nun.gl-imi saqqummersinneqassapput.
Illoqarfik nunaqarfilluunniit allattorsimaffinnut ilanngunneqaruni, taava killilersuutit pingasut atuutilertassapput:
- Coronapasimik takutitsisinissamut piumasaqaat
- Tamanit ornigarneqarsinnaasuni isersimasinnaasut amerlanerpaaffissalernerat - tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.
- Sumiiffinni tamani tamanut iserfigineqarsinnaasuni qanermut assiaquteqarneq.
Inuit akunnerni arlalinni silami siuleriiaattuni utaqqipput. Qanoq ingerlanneqarnissaanut allanik pilersaaruteqarpisi?
- Piffissamik inniminniisimanngitsut takkutiinnartut piffissamik inniminniinikut utaqqisariaqarnerannik kinguneqartitsisarput. Piffissamik inniminniisoqarnissaanut allamik aaqqiissutissarsiuleruttorpugut. Sapaatip akunnerata tullianit aallartinnissarput naatsorsuutigaarput. Inuilli tamarmik piffissami ataatsikkut misissortinniarseratigut siuleriiaattut pinngitsoortinneqarsinnaanngillat.
AAMMA ATUARUK Corona pillugu ullumikkut kisitsisit: Tunillatsissimasut nutaat 270-it ippassarmit paasineqartut
Ilulissani tuniluuttoqarnera pissutigalugu corona pillugu killilersuutit nutaat atuutilerput. Inuit sumiiffinnut tamanit iserfigineqarsinnaasunukarniarunik coronapasimik takutitsisinnaassapput aamma soorlu bussini, taxani qanermut assiaquteqassapput, kiisalu neriniartarfinni imerniartarfinnilu qatserisartut inoqarsinnaassusaatut akuerisaasa affaannaat kisimik isersimasinnaatitaallutik.
