Corona pillugu ullumikkut kisitsisit: Tunillatsissimasut nutaat 180-t utoqqarlu toqusoq

Nakorsaaneqarfiup oqarnera naapertorlugu Dronning Ingridiup Napparsimmavissuani utoqqamik covid-19-imik pissuteqartumik toqusoqarpoq. Napparsimmavimmi uninngasut katillugit sisamaapput.

Allattoq Malik Brøns

januaarip 31-at 2022 17:13

Utoqqaq Dronning Ingriudiup Napparsimmavissuani coronamik pissuteqartumik toquvoq. Tunillatsissimanera toquneranut pingaarnerussangatinneqarpoq.

Nakorsaaneqarfik nittartakkamini taama paasissutissiivoq.

Nunatsinni killilersuinerit - naatsumik

Nunatsinni tamarmi tamanit iserfigineqarsinnaasuni coronapas atuutissaaq. Tassa neriniartarfinni, imerniartarfinni, filmertarfinni, katersortarfinnilu assigisaanilu.

Ukununnga isissaguit qanermut assiaquteqassaatit

Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
Bussinut taxanullu ilaanermi.

Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit. Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.

Danmarkimit angalasut

Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.

Taamaalilluni nunatsinni coronamik tunillatsissimasunik katillugit arfinilinnik maanna toqusoqarpoq.

Tallimanngornermut maannamut corona pissutigalugu napparsimmavimmi uninngasut qulingiluat maanna angerlarsimalerput.

Ullumikkut uninngasut tallimaapput. Nuummi pingasut, Qaqortumi ataaseq Ilulissanilu ataaseq.

AAMMA ATUARUK Coronamut tunillatsissimasumik toqusoqaqqittoq

Uninngasunit sisamat corona pingaarnertut pissutigalugu uninngapput. Taakkunannga ataaseq peruluttut uninngavianniippoq.

Uninngasunit ataasiinnaq allamik pissuteqarluni uninngavoq, coronamilli tunillatsissimanera tassunga sunniuteqarani.

Nakorsaaneqarfiuttaaq meeqqat marluk coronamik tunillatsissimanermi kingorna kingunerluuteqassangatinneqartut peruluttut uninngavianniittut suli uninngapput.

Tallimanngormamit ullumikkumut PCR-imik misissuinernit 310-nit tunillatsissimasut nutaat 180-it paasineqarput.

Nutaarsiassami kukkunermik nassaarsimaguit uunga allaffigineqarsinnaavugut.