Coronahotlinep oqarasuaatai aningaasanik ikiorsiisarneq pillugu amerlisut

Coronamik tunillatsissimaguit imaluunniit angerlarsimaannartussaatitaaguit sulisinnaanallu taava corona-hotlinemut sianerlutit ikiorsiissuteqartoqarnissaanut periarfissanik paasiniaasinnaavutit.

Allattoq Malik Brøns

decembarip 10-at 2021 12:58

Corona nunatsinni tuniluutileruttorpoq.

Illoqarfiit pingaarnersaanni, Nuummi ullormut 20-nit 30-nit tunillatsissimasoqaannaavippoq. Nunatta avannaani Upernavimmi Qasigiannguanilu amerlasuut aamma tunillatsissimapput.

Tamanna tiimimusiallit amerlasuut angersimaannaqqusaanertik pissutigalugu suliartorsinnaannginnerannik kinguneqarsinnaavoq.

Taamaammat coronahotlinemi immikkut ittumik oqarasuaammik pilersitsisoqarpoq.

Coronahotline oqarasuaataa 80 11 00, ullut tamaasa nalunaaqutaq 13-imit 16-imut ammasarpoq.

AAMMA ATUARUK Coronamik eqqorneqarsimaguit: Aningaasatigut ima ikiorneqarsinnaavutit

Oqarasuaat taanna pilersinneqartoq aningaasatigut ikiorsiissuteqarfigineqarnissamut periarfissanik paasiniaaniaraanni sianerfigineqarsinnaavoq.

Naalakkersuisut tusagassiuutinut nalunaarutaat naapertorlugu angerlarsimaannartussaatitaanermut ikiorsiissutit pissarsiarineqarsinnaasut marluupput.

Tunillatsissimagaanni imaluunniit corona pillugu aqutsisoqarfimmit angerlarsimaannartussaatitaagaanni suliffeqarnermut ikiorsiissutinik pisartagaqarsinnaatitaavoq, piumasaqaatillu uku naammassisimassapput:

Kalaallit Nunaanni inunnik nalunarsuiffimmi nalunaarsorneqarsimaneq
18-inik ukioqalersimaneq pilersuisuunerluunniit, aamma
Sapaatit akunnerini 13-ini kingullermi akissarsiaqartutut minnerpaamik tiimini 182-ini sulisimaneq.

Sapaatit akunneri 13-it ullut 91-iupput – tassa qaammatit pingasut missaat.

Tamanna pillugu annerusumik Sullissivik aqqutigalugu atuagaqarsinnaavutit.

Suliffeqarnermi ikiorsiissutinik pissarsiassat annertussusaannut malittarisassat naapertorlugit ikiorsiissutit sapaatini akunnerni 13-ini akunnerit qassit sulisimaneq aallaavigalugu naatsorsorneqartarput.

Akunnerit amerlanerusut sulisimagaanni pissarsiassat annertunerussapput.

Periarfissaq alla tassaavoq, sapaatini akunnerni kingullerni 13-ini akissarsiaqartutut minnerpaamik akunnerni 182-ini sulisimagaanni taava pisortanit ikiorsiissutinik qinnuteqartoqarsinnaavoq.

Taakku pillugit annerusumik Sullissivik aqqutigalugu atuagaqarsinnaavutit.

Nutaarsiassami kukkunermik nassaarsimaguit uunga allaffigineqarsinnaavugut.