Coronamut killiffik pillugu nalunaaqutaq ataatsimut tusagassiortunik katersortitsisoqassasoq
Nakorsaaneq, Henrik L. Hansen, Naalakkersuisut siulittaasuat, Múte B. Egede aamma niuernermut naalakkersuisoq, Pele Broberg katersortitsinermi peqataassapput.
Tusagassiortunik katersortitsinermi nunatsinni corona pillugu killiffik sammineqassaaq.
Sapaatit akunneri marluk matuma siorna kingullermik tusagassiortunik katersortitsisoqarpoq. Tassani nutaarsiassatsialaqarpoq: Killilersuutit kingulliit atorunnaarsinneqarput, qanermut assiaqut iginneqarpoq, imerniartarfiit neriniartarfiillu isersimasoqarsinnaassusertik malillugu isersimatitsisinnaalerput – tamatumalu saniatigut kommunini pingasuni imigassamik inerteqquteqarneq atorunnaarsinneqarluni.
Tamanna Nakorsaaneqarfiup nappaalaneq illoqarfinni anginerni pingasuni amerlanerpaaffissaaneereerneranik naliliinerani pivoq. Tamatuma saniatigut tuniluunneq siammasingaarmat killilersuisoqaraluarpat tamanna apeqqutaanaviarnani.
Tamatuma kingunerisaanik Tasiilami ilaatigut tuniluuttoqaqqilerpoq.
AAMMA ATUARUK Coronamik tunillatsissimasumik toqusoqaqqittoq
Nunatsinni covid-19-imik pissuteqarlutik imaluunniit tunillatsissimasut toqusut katillugit maanna 13-iupput.
Nakorsaaneqarfiup nittartagaani tunillatsissimasut amerlassusaat tallimanngormameersuupput. Tassanilu PCR-imik misissukkat 127-t akissutersineqarpoq, taakkulu 24 procentii tunillatsissimasuupput.
PCR-imik misisukkat Danmarkimi misissoqqissaartussanngortinneqartarput. Nunatsinni misissukkat tamarmik omikronimik tunillatsissimasuusut, misissueqqissaarnerup kingulliup takutikkaa, Nakorsaaneqarfik nun.gl-imi paasissutissiivoq.
Tunillatsissimasut januaarimi amerlassusaat procentinngorlugit 60-iupput.
Nunatsinni tuniluunnerup eqqorluartumik qanoq innera ilisimaneqanngilaq. Napparsimarululersinnaasut kisimik PCR-imik misissortissinnaapput. Allat sinneri angerlarsimallutik peqqissinissartik utaqqissavaat, aamma imminnut peqqissisutut nalunaarutigisassapput.
