Danmarkimi aatsaat taama kiatsigisoq

Danmarkimi ullumi pingasunngornermi aatsaat taama kiatsigaaq.

Jyllandip kitaani Borrisimi danskit nalunaaqutaat malillugu ullumi pingasut missaanni 35,6 gradinik kiappoq.

Danmarkimi 1941-mi aatsaat taama kiatsigimmat Morsimi Erslevimi Herningillu eqqaani Studsgårdimi juulimi 35,3 gradinik kiappoq.

Danmarkimi silasiorfik, Danmarks Meteorologiske Institut (DMI), Twitterimi taama allappoq.

Danmarkimi Holstebromi kingullermik 1975-imi aggustimi aatsaat taama kiatsigimmat 36,4 gradinik kiappoq.

Danmarkimi 2006-imi juulimi aasarisseruttornerani aamma kiarujussuaqattaarpoq.

Danmarkimi taamanikkut juulimi agguaqatigiisillugu 19,8 gradinik kiappoq.

AAMMA ATUARUK Sønderjyllandimi illoqarfeeqqami aatsaat taama kiatsigissagunartoq

Tassa 1994-imi juulimi aatsaat taama kiatsigineraninngarnit 0,3 gradinik kiannerusimasoq, TV 2 allappoq.

Danmarkimi kiarujussuassasoq, DMI-p ippassaq marlunngornermi ilimasaarutigaa. Sumiiffik ulluni tulleriinni pingasuni agguaqatigiisillugu 28 gradit sinnerlugit kiakkaangat kiarujussuartutut taaneqartarpoq.

Ippassaq marlunngornermi kiarujussuarpoq, sumiiffiillu ilaanni ullumi pingasunngornermi 35 gradit sinnerlugit kialluni.

Ataasinngormalli 25 gradit angusarlugit kiappoq, aqagulu sismanngornermi aamma taama kiassangatinneqarmat ilumut aatsaat taama kiatsigiumaarnissaa nalunartoq, DMI erseqqissaavoq.

Europamilu sumiiffiit ilarpassuini aamma kiarujussuarpoq. Europamiillu Danmarkimut kianngarmat tamaani kiarujussuarpoq.