Sønderjyllandimi illoqarfeeqqami aatsaat taama kiatsigissagunartoq

Danmarkimi aqagu pingasunngornermi immaqa aatsaat taama kiatsigissaaq.

Danmarkimi Holstebromi kingullermik 1975-imi aatsaat taama kiatsigimmat 36,4 gradinik kiappoq.

Sønderjyllandimili illoqarfeeqqat ilaanni Store Jyndevadimi aqagu pingasunngornermi immaqa aatsaat taama kiatsigissasoq, Danmarkimi silasiorfiup Danmarks Meteorologiske Institutip (DMI) nittartagaani allaqqavoq.

- Tysklandimiit kianngartussaammat, Store Jyndevadimi immaqa aatsaat taama kiatsigissaaq.

- Europamiit maanna kiaqisumiit Danmarkimut kianngarpat Store Jyndevadimi immaqa aatsaat taama kiatsigissaaq, DMI nittartakkamini erseqqissaavoq.

DMI Store Jyndevadimi danskit tyskillu killeqarfiata eqqaaniittumi silasiorfeqarpoq.

Store Jyndevadip inissisimanera illoqarfeeqqami tamaani aatsaat taama kiatsigissagunarneranut peqqutaasoq, DMI-p silasiortuisa ilaat Lars Henriksen erseqqissaavoq.

- Europamiit danskit tyskillu killeqarfiannut kianngassasoq silasiorfimmit nunat assinganni erserpoq.

- Danmarkimi sumiiffiit ilaat sineriaagamik taama kiatsigisanngillat. Store Jyndevadili Sønderjyllanip qiterpiaaniikkami kiarujussuartarpoq.

AAMMA ATUARUK Europami nunat kiarujussuarnerata kingunerisaanik pinngortitami ikuallattoqarnera unammillissutigigaat

Store Jyndevadimili aqagu pingasunngornermi aatsaat taama kiatsigissanngikkaluarpalluunniit 35 gradit missaanni kiassangatinneqarpoq tamannalu qaqutigoortoq, silasiortoq erseqqissaavoq.

- 30 gradimmi sinnerlugit qaqutiguinnaq kiattarmat, kiarujussuartussaassaaq.

- Qaqutiguinnaagaluartumilli kiarujussuartaraluartoq kiarujussuartussaanissaa allanartuunngilaq. Aasalli tamaasa kiarujussuartanngilaq, Lars Henriksen oqarpoq.

Tamaani kiarujussuassasoq, DMI-p ullumi marlunngornermi ilimasaarutigaa. Sumiiffik ulluni tulleriinni pingasuni agguaqatigiisillugu 28 gradit sinnerlugit kiakkaangat kiarujussuartutut taaneqartarpoq.

Ullumi marlunngornermi aqagulu pingasunngornermi 30 gradit sinnerlugit kiatassaaq, sumiiffiillu ilaanni 35 gradit angullugit kiattassalluni.

Ippassarli ataasinngornermi 25 gradit angusarlugit kiappoq aqaguagulu sismanngornermi aamma taama kiassangatinneqarmat ilumut aatsaat taama kiatsigiumaarnissaa nalunartoq, DMI erseqqissaavoq.

Danmarkimi sumiiffiit ilaanni kiangaatsiarnera ingammik Europamiit maanna kiaqisumiit kianngarneranik peqquteqartoq, Lars Henriksen nassuiaavoq.

- Aqaguli pingasunngornermi ullup unnuullu ingerlaneranni kanannissaaq, immamilu Danmarkip Tuluit Nunaallu akornanniittumi, Nordsøenimi, taama kiatsiginavianngimmat pueqquuminerulissaaq.

- Danmarkilli avannaata kangisissuani aqaguagu sisamanngornermi 25 gradit missaanni kiassangatinneqarpoq. Taava tallimanngorpat arfininngorpallu pueqquuminerulissaaq, sapaatiuppamiilli kiangaatsiaqqilissalluni.