Danmarkimi isumasiuineq: Moderatit taaguuneqarnerit pingajorissagaat DF-ilu isertitaqarani

Moderaterne med den tidligere statsminister Lars Løkke Rasmussen i front er steget eksplosivt i meningsmålingerne, siden valget blev udskrevet for to uger siden.

Moderaterne ministeriunerusimasoq, Lars Løkke Rasmussen siulittaasoralugu qinersinissap sapaatit akunnerisa marluk matuma siorna suaarutigineqarneraniit isumasiuinermi siuangaatsiarput.

Voxmeterip Ritzau-imut isumasiuinera nutaaq naapertorlugu Moderaterne aqagu qinersisoqassagaluarpat qinersisartut 9,2 procentiisa taaguutissagaluarpaat. Partii taamaalilluni 17-init isertitaqassagaluarpoq.

Moderaterne qaammatip ataatsip matuma siorna 1,8 procentiinit taaguunneqartussaarpasillutik isertitaqanngitsoortussaarpasikkaluarput.

Dansk Folkepartiilu maanna 1,8 procentiinit taaguunneqartussaarpasilluni isertitaqanngitsoortussaarpasippoq.

DF qaammatini arlalinni 2 procentimik taaguunneqartussaarpasillutik aarlerinartorsioreersimapput. Qineqqusaalerrermili aatsaat Voxmeterip isumasiuinerinit Folketingimi ilaasortaqartusaajunnaarpasilerput.

Siullermik oktobarip arfineq-aappaaniuvoq, tassani 1,7 procentinit taaguunneqartussaarpasimmat.

Savalimmiut nunarpullu aalajangiisuussasut

Partiit saamerliit 87-inik qinigaatitaqartussaarpasillutik maanna siuangaatsiaqqapput, partiillu talerperliit 71-inik qinigaatitaqartussaarpasillutik.

Partiilli saamerliit talerperliilluunniit kisimiillutik 90-inngorsinnaanngillat. Moderaternit qinigaatitaqaraluarpataluunniit taakku amerlanerussuteqalernissamut naammanngillat.

Taamaammat nunanit avannarlernit qinikkat – tassa Savalimmiunit marluk nunatsinniillu marluk – isumasiuineq nutaaq naapertorlugu qinersinerup inerneranut pingaaruteqarluinnarsinnaapput.

Voxmeterip isumasiuinera naapertorlugu Inger Støjberg taassumalu partii pilerseqqammigaa Danmarksdemokraterne kinguariartuinnarpoq.

Partii aggustip aallartinnerani 11,2 procentinit taaguunneqartussaarpasittoq maanna 7,4 procentinit taaguunniarneqarpasippoq.

AAMMA ATUARUK Ministeriunertut qinigassanngortittup nunarput Afrikatut sikumiittutut taasimallugu uppernarsaraa

De Konservativet aamma kinguariartorput. Søren Pape Poulsenip ministeriunerulerniarnera aggustip 15-iani nalunaarutgineqarmat partiip Venstre naligalugu 13 procentinit taaguunneqartussaarpasippoq.

Taassuma qinigassanngortinnini nalunaarutigimmagu partii qaffariallappoq, isumasiuinermilu ataatsimi 16,5 procentinit taaguunneqartussaarpasilerluni.

Tamatumali kingorna Søren Pape Poulsenimut tunngasut innarliisinnaasut arlaliupput. Ilaatigut aapparisimasaa eqqunngitsunik oqalussimasoq paasineqarpoq, konservativellu siulittaasuata tamanut oqaluttuaraa.

Kingullermik nunatsinnut tunngatillugu nikassaarpaluttumik nipeqartumik inatsiseqarnermut ministeritut nunarput Afrikatut sikumiittutut” taasimaneranik utoqqatsissuteqarpoq.