Danskit ministeriata oqarasuaatinut angallattakkanut akigititat qaffasissut appartikkusukkai
Danskit nunanik avannarlernik suleqateqarnermut ministeriat, Flemming Møller Mortensen (Soc.dem.), nunatta Danmarkillu akornanni attaveqatigiinnerulernissaq siunertaralugu qanittukkut Nuummiillunilu Ilulissaniippoq.
Innuttaasut naalagaaffeqatigiit akornanni angalasut killeqarfimmi ajornartorsiutaasa ilaannut aaqqiissuteqarnissaq pissutigalugu taassuma tikeraarnermini nunanut allanut tunngasunut naalakkersuisoq, Vivian Motzfeldt (S), ataatsimeeqatigaa.
- Naalagaaffeqatigiinni nunat ataasiakkaat qanoq naleqqussassanerlutik namminneq aalajangertarpaat, taamaakkaluartoq nunani taakkunani inuit killeqanngitsumik aporfippassuaqanngitsumillu angalasinnaassapput, Flemming Møller Mortensen oqarpoq.
AAMMA ATUARUK EU er ved at afskaffe roamingafgift
Taassuma oqarasuaatinut akitsuutit apparneqarnissaat kissaatigilluinnagaasa ilagaat.
Oqarasuaatinut akigititat
Danmarkimiit nunatsinnut:
Oqarasuaatileqatigiiffiit arlallit Danmarkimiit nunatsinnut sianernermut akigititaat minutsimut 5 koruunit 16 koruunillu akornanniikkajupput. Oqarasuaatileqatigiiffiit arlallit tamatuma saniatigut siarnermut ataatsimut akitsuusiisarput.
SMS-erneq ataaseq 3 koruunit 5 koruunillu akornanni akeqqakkajuppoq.
Mobildata 100 MB-imut 10 koruunit missaannik akeqarpoq.
Nunatsinniit Danmarkimut (Tusass):
Nunatsinniit Danmarkimut sianerneq minutsimut 0,99 koruunit 3,64 koruunillu akornanni akeqarpoq.
Mobildata 100 MB-imut 3,06 koruunit 4,34 koruunillu akornanni akeqarpoq.
Flemming Møller Mortensenimmi oqarasuaatileqatigiiffiit soorlu Danmarkimiit nunatsinnut sianernermut akigititaat qaffasippallaarujussuarsorai:
- Unneqqarilluinnassaanga. Aaqqiisoqartariaqarsoraara, iluanaaruteqalertoqartorli tamanna iluaagineqarsinnaasartoq nalunngilarput. Inuilli naalagaaffeqatigiit iluanni angalanerminni aningaasartorujussuannginnissaat kissaatiginarpoq, Flemming Møller Mortensen oqarpoq.
EU-mi sianerneq mobildatamillu atuineq qanoq akisutiginissaat killiligaapput, nunarpulli EU-mi ilaasortaanngimmat maani allanik malittarisassaqarpoq.
Taamaammat oqarasuaatileqatigiiffiit aamma Tusass akisussaaffimmik tigusisariaqarlutillu akigititaminnik appaasariaqartut, Flemming Møller Mortensen isumaqarpoq:
Flemming Møller Mortensenip oqarnera naapertorlugu oqarasuaatileqatigiiffiit Tusassillu akit qanoq appartinneqarsinnaanissaat isumaliutigilluartariaqarpaat:
- Kalaallit Nunaanni oqarasuarnermut tunngatillugu Tusassip qanoq iliorniarnerluni isumaliutigisariaqarpaa.
- Kalaallit Nunaanni roaming eqqartorneqartillugu Tusassip qanoq iliorniarnerminik piareersaanissaa apeqqutaavoq.
Tusassip Danmarkimi oqarasuaatilerisut akisussaatippai
Oqarasuarnermi akit qaffasinnerusinnaanerat,assersuutigalugu oqarasuaatileqatigiiffinni allani qaffasinnerusinnaanerat, Tusass isumaqarpoq.
Flemming Drechsel, Tusassimeersoq, KNR-imut mailikkut ilaatigut taama allappoq:
- Kalaallit Nunaanni oqarasuaatilimmut Danmarkimit sianernermi Tusass minutimut nalinginnaasumik 0,22 koruuneqartitsisarpoq. Danmarkimit nunatsinnut sianertut akigititaannut, ilaatigut qaffasissunut, tamanna pillugu nassuiaatissartaqanngilaq, taanna oqarpoq.
Mobildatamut akigititanut tunngatillugu Tusass aamma isumaqarpoq akisussaaffik Danmarkimi oqarasuaatileqatigiiffinniittoq. Danmarkiminngaanniimmi sianertut qanoq akiliitigisassanersut, Tusassip akigititaannut assigiinngisaartorujussuupput:
- Minutimummi ataatsimut, megabytemulluunniit ataatsimut Danmarkimi oqarasuaatileqatigiiffiit Tusassimut akiliutigisartagaat, namminneq Danmarkimi oqarasuaatilinnut akigitaannut annikinneerarsuupput. Tusassip tamanna nammineq allanngortissinnaanngilaa. Danmarkimi oqarasuaatileqatigiiffiit oqarasuaatillillu akunnerminni tamanna isumagisassaraat, Flemming Drechsel, Tusassimeersoq, KNR-imut mailukkkut allappoq.
Atortunik malinnaaniarnerup kingorna ilungersorneq: Kalaallit peqqissaasut Danmarkimi maanna sulisinnaasut
Nunatta Danmarkillu akornutaasoq alla aaqqiissuteqarfigerusutaat peqqissaasut nunatsinni ilinniarsimasut Danmarkimi sulisinnaanissaasa ajornaannerunissaanut tunngavoq.
Suliaq taanna, kalaallip peqqissaasup, Rune Olsenip ilinniarnermi Danmarkimi oqartussanut akueritinniarnera Danmarkimilu peqqissaasutut sulinissamut uppernarsaatissarsiniarnera qaammatinik pingasunik sivisussuseqarsimasoq, KNR-imut siorna oqaluttuarimmagu ukkatarineqalerpoq.
AAMMA ATUARUK Kalaaleq peqqissaasoq Danmarkimi akunnattooqqasoq
Naak nunatsinni peqqissaasunngorniarneq danskit piumasaqaataat naapertorlugu ingerlasaraluartoq taama pisoqarpoq.
Flemming Møller Mortensenip oqarnera naapertorlugu suliaq taanna maanna aaqqiissuteqarfigineqareersimassaaq:
- Aaqqiissutissarsivugut, tassa kalaallit peqqissaasunngorniarfiata ilaa akuerisaalereerluni. Tassa imaappoq kalaallit peqqissaasut akuerisaasumik aallartinniarnerat ajornaannerungaatsialerpoq.
Flemming Møller Mortensen nammineerluni peqqissaasuunikuuvoq Ilulissanilu peqqinnissaqarfimi sulinikuulluni. Taassuma Ilulissaniinnini inuttut allannguutigingaatsiarlugulu ilinniarfigingaatsiarpaa.
- Inuttut uannut allanngorfiuvoq. Illoqarfimmi suleqatigissaarlunga ikinngutitaarpunga, taakkulu suli attaveqarfigaakka, Flemming Møller Mortensen oqarpoq.
Taassuma taamaammat naalagaaffeqatigiit iluanni innuttaasut immisulli nunat pingasut iluanni angalanissamut, sulinissamut ilinniarnissamullu periarfissaqarnissaat kissaatigaa.
