Demokraatit kamattut: Killilersuutit imigassamillu inerteqquteqarneq unitsillik

- Kajumissaarineruvoq. Inuussutissarsiorneq ajornartorsiorpoq, siulittaasoq oqarpoq. Sulisitsisut erngertumik ikiorsiissuteqartoqarnissaa kissaatigaat.

Allattoq Christine Hyldal

januaarip 26-at 2022 11:59

Múte B. Egede imaluunniit naalakkersuisoq alla corona pillugu tusagassiortunik katersortitsisoqaraangat killilersuutinik nutaanik saqqummiisarput. Tamanillu iserfigineqarsinnaasuni coronapasimik takutitsisarnissaq qanermullu assiaquteqarnissaq nuna tamakkerlugu ippassaq atulersinneqarput.

Neriniartarfiit imerniartarfiillu qatserisartut malittarisassaat naapertorlugit inini amerlanerpaamik isersimasinnaasut malillugit affaannaannik isersinnaatitsinerat maanna nuna tamakkerlugu atuutilerpoq. Neriniartarfiit unnukkut qulinut matusassapput, ippassallu unnukkut kingusissukkut nalunaarutigineqarpoq nunatsinni kommuninit tallimanit pingasut imigassamik tuniniaasinnaanermut aamma inerteqquteqalersitsisut.

Nunatsinni killilersuinerit - naatsumik

Nunatsinni tamarmi tamanit iserfigineqarsinnaasuni coronapas atuutissaaq. Tassa neriniartarfinni, imerniartarfinni, filmertarfinni, katersortarfinnilu assigisaanilu.

Ukununnga isissaguit qanermut assiaquteqassaatit

Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
Bussinut taxanullu ilaanermi.

Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit. Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.

Danmarkimit angalasut

Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.

Pinerillu tamaasa oqaatigineqartarpoq: Partiit siuttuisa isumaqatigiipput.

Pele Brobergillu peqqinnissamut naalakkersuisumut paarlattaasup ippassaq oqaatigaa:

- Killilersuutit nutaat partiit tamarmik siulittaasuisa akueraat.

Maannali ajornartorsiuteqarpoq. Demokraatimmi naammatsipput.

- Nappaalanerup nalaani kalaallit ataatsimoorsimanerat nukissaqarsimanerallu tanngassimaarutigisorujussuuara. Inatsisartunilu nappaalanerup pakkersimaarnissaanut suleqatigiinnerput isumaqatigiinnermik takutitsisoq tanngassimaarutigisimallugu. Maannali uanga Demokraatillu naammagiliivugut, Demokraatit siulittaasuat, Jens Frederik Nielsen oqarpoq.

AAMMA ATUARUK Unnuap qeqqanit atuutilissasoq: Kommunini pingasuni imigassamik inerteqquteqarneq

Taassuma oqarnera naapertorlugu neriniartarfiit imerniartarfiillu unnukkut qulinut matusarnerat unitsinneqassaaq. Aamma ininut isersinnaasut affaannaanik isertitsinerteq unitsinneqassaaq. Imigassamillu inerteqquteqarneq taassuma isumassaqartinngilaa.

- Demokraatit imigassamik inerteqquteqarneq tunngaviusumik akerleraa. Inunnik akisussaaffiiaaneruvoq, silatusaartumik iliuuseqarnermut tunngavilersuutissaqanngilaq, nakorsaanerummi tuniluunneq annertunerpaaq meeqqat akornanniittoq oqaatiginikuuaa, Demokraatit siulittaasuat oqarpoq.

Ulluinnarnut nalinginnaasunut uteqqinneq

Danmarkimi corona pillugu kililersuutit tamarmik ullumi atorunnaarsinneqarput, Savalimmiunilu atorunnaarsinneqarnissaat innersuussutaavoq. Taamaammat nunatsinni naalagaaffeqatigiinni killormut ingerlasoqarpoq – tamannalu kukkunerusoq, Jens Frederik Nielsen isumaqarpoq.

- Maanna pissutsit imaalersimapput Omikron allamoorutini nukittunertut inissisimalersimasoq. Tamanna pitsaasutut isigineqarsinnaavoq, allamoorut taannarpiaq nappaat inuiaqatigiinnut navianartorsiortitsisinnaasutut nalilersorneqarsinnaanngimmat. WHO oqariartuuteqareerpoq Omikron nappaalanerup killissarisinnaagaa. Qallunaallu Nunaannilu tusagassiorfiit nalunaarutigaat Epidemikommission Omikron peqqutigalugu corona inuiaqatigiit peqqissutsikkut navianartorsiorunnaassasut, tamannalu kingunerisinnaallugu Qallunaat Nunaat ulluni tulliuttuni killilersuinerit atorunnaarsittussanngussagai.

- Tamanna tunngavigalugu maani nunatsinni ulluinnaat uterteqqikkiartuaarnissai piffissanngorsoraara. Tamanna soorunami aamma partiit siuttuisa naapinnerini tunngavilersuutigisarsimavara, oqalliffilli taanna oqariartuutinik apuussiffigiuminaassimavoq.

Kajumissaarineruvoq – matumik matusinerunngilaq

Killilersuutinut akerliuguit sooruna ippassaq akuersivit?

- Partiit ataatsimiinnerinut ataqqinnilluta peqataasarpugut. Allanut ataqqinnippugut, ataatsimoorsinnaallutalu eqqortumik nassaaqarluta. Suliarineqareersimasut pillugit isumaqatigiinngingaatsiarpugut – taakkuli ilutsinni pigiinnarpagut. Matumik maanna matusinngilagut – qaaqquneqaqqikkuma takkuteqqissaanga. Kajumissaarineruvoq. Inuussutissarsiorneq ajornartorsiorpoq.

- Partiit siulittaasuini isumaqatigiissutigaarput inuussutissarsiuteqartut tamakkiisumik taarsiiffigineqassasut. Taamaakkaluartorli inuussutissarsiuteqartunut taarsiissuteqarnissamik suliaqarneq aallartilluanngitsorluunniit taarsiissuteqarneq tamakkiisuunngilaq. Tamanna pissutigalugu suliffeqarfiit kinguariangaatsiarput, akiliisinnaajunnaarnissamullu aarlerinartoqarnera qaffakkiartuinnarluni. Inuussutissarsiortutta ilaata ajalusoorluinnarnissaanut aarlerinartoqarpoq. Taamaattoqarsinnaanngilaq.

Sulisitsisut killilersuutinut aamma akerliupput. Sulisitsisut katerinnissamut killilersuutit coronapasilu atorunnaarsikkusukkaat, tusagassiuutinut nalunaarummi allapput.

AAMMA ATUARUK Nunatsinnut angalasut misissortittarunnaartut sumiiffinnilu killilersuutit nuna tamakkerlugu atuutilersut

- Tamanna pitinnagu, aaliangiisuulluinnassaaq, naammattunik ikiorsiissuteqarnissaq massakkut aaqqittariaqarpoq. Killilersuutit suliffeqarfinni sulisitsisut kisiisa annertuumik eqqunngilaat. Aamma sulisut eqqorpaat, inuussutissarsiornermik namminersortuni atorfillit, akissarsiaqartinnagit angerlatiinnartariaqartartut napparsimanerat peqqutigalugu imaluunnit ajornerpaaffiani suliffitsit annaaratarsinnaavaat, suliffeqarfiut isertitai naammagunnaarmata atorfilittamik aningaasarsitinnissaannut, Sulisitsisut nalunaaruteqarput.

- Sulisitsisut qaammaterpassuarni politikkikkut iliuuseqartoqarnissaa ujartorsimavaat. Tamaviaarluta ikiorsiissutit atuutitilernissaat pillugit sulisimavugut aamma killilersuisoqalissagaluarpat peqatigitillugit nalunaaruteqartarnissat pillugit. Kisianni aammaarluni akerlianik pisoqarpoq, politikkimik suliaqartut taamaasiortoqarnissaannik neriorsorneqarsimagaluarluta. Sakkukitsumik oqaatigalugu pakatsinarpoq.

Nutaarsiassami kukkunermik nassaarsimaguit uunga allaffigineqarsinnaavugut.