- Aputeqarnissaa qularnaannerpaassagaluarpoq – qernertuinnaavorli
Kiassuseq minusinut apparpoq. Apulli tamangajammi aappoq, kavaajarlu ukiorsiut oqorpallaarpoq. Nuummi ippassaq 12,6 gradimik kiappoq.
Nunatsinni illoqarfiit pingaarnersaanni kiannera decembarip qaammataani siorna kiannerpaaffiginikuusaa angungajappaa: Siorna decembarip ulluisa 27-anni 13,7 gradimik kiassuseqartoq uuttorneqarnikuuvoq.
DMI naapertorlugu Nuumm decembarimi sila aatsaat taama kiatsigaaq.
AAMMA ATUARUK Juulli aputeqarpianngitsoq: Nuup decembarimi kiannerpaaffigisimasani angungajakkaa
- Eqqunngippalaartorujussuuvoq, Anu Graahede KNR-ip illoqarfiit pingaarnersaanni Imanermi naapitaa oqarpoq.
- Juullimi aputeqangaatsiartussaagaluarpoq, 15-inik issilluni, qaqorluni nuannerlunilu. Maannali alianarlunilu taarpoq.
- Aatsaat siullerpaamik maani juullisiussaanga, kisianni Sanami sulissaanga. Eqqunngippalaartorujussuuvorli Kalaallit Nunaannukarluni aputeqarnissaa qulakkeeqqassaluarpoq, maannali qernertuinnaavoq. Juullimut apummik qerinnarnissaanillu kissaateqarpunga, Anu Graahede oqarpoq.
Qaasernartoq. Assi: KNR
Illoqarfiit pingaarnersaanniinnaq ukiup taamaalinerani nalinginnaanngitsumik kianngilaq: Nunattami ilarujussuani marlunnik kisitsitalimmik ulluni kingullerni kiattarpoq.
Kangerlussuarmi decembarimi nalinginnaasumik marlunnik kisitsisitalimmik issittaraluarpoq, ippassarli DMI naapertorlugu aatsaat taama kiatsigaluni 11,5 gradimik kiappoq.
Qaanaami decembarimi agguaqatigiissillugu 20,1 gradimik issitsigisaraluarpoq, maannali 8,3 gradimik kiattoq uuttorneqartoq DMI paasissutissiivoq.
Nuummi illoqarfiup qeqqa qaserujulluni aputeqanngingajavippoq. Assi: KNR
Tunumi kavaajaq aamma singissaarneqarsinnaavoq.
Ittoqqortoormiini 4,8 gradimik kiattoq aamma Tasiilami Kulusummilu 5 gradit missaannik kiattoq uuttornqarpoq.
Ittoqqortoormiini nalinginnaasumik maannakkut 12 gradinik qerinnartussaagaluarpoq, Tasiilamilu 4,9 gradimik issittussaagaluarluni.
Assi: KNR
- Aput nillerneralu amigaatigaara, Viktor Otte Nuummi Imanermi oqarpoq.
- Silap maanna qanoq innera Kalaallit Nunaajorpasinngilaq. Inuit nunanit allanit tikittut aamma taama oqassagaluartut isumaqarpunga.
Juullimut apummik qerinnarnissaanillu kissaateqarpit?
- Aasaq uanga nuannarineruvara, Viktor Otte illaatigaluni oqarpoq.
