Dronning Margrethe coronamik tunillatsisimareerluni mattusimajunnaartoq
Dronning Margrethe coronamik tunillanneqarsimareerluni mattusimasariaqarunnaartoq nakorsap sapaammi nalilerpaa.
Kunngikkormiut nittartakkami Instagramimi taama allapput.
- Ataqqinartorsuup Dronningip COVID-19-imik tunillatsissimanermini annikitsuinnarmik nalunniuteqareerluni mattusimanini unitsissinnaagaa nakorsap ullumi nalilerpaa, kunngikkormiut allapput.
Dronning Margrethe marlunngornermi unnukkut coronamut missisortinnerani tunillanneqarsimasoq paasineqarpoq. Dronningi annikitsuinnarmik ersiuteqartoq kunngikkormiut pingasunngornermi aamma nalunaarutigaat.
Dronningilu Amalienborgimi Christian 9's Palæmi mattusimasoq paasissutissiissutigineqarluni.
Ukiuunerani sulinngiffeqanngitsoq
Dronningip Norgemi ukiuunerani sulinngiffeqarnissani pingasunngornermi aallartitussaagaluarpaa. Covid-19-milli tunillanneqarnini pillugu Norgeliarnissani taamaatippaa.
Dronningi covid 19-mut pingasoriarluni akiuussuserneqarsimavoq. Siullermik akiuussutissamik kapitippoq jannuaarip ulluisa aallaqqaataani 2021-mi. Novemberillu naalernerani uppernarsarpaa pingajusaanik akiuussusertissimanini.
Kunngikkormiuni aatsaat coronartoqanngilaq.
AAMMA ATUARUK Dronning Margrethe coronavirusimik tunillatsissimasoq
Kunngissap nulia Mary aamma taakkua ernerat angajulleq Prins Christian coronamik siusinnerusukkut tunillanneqarput.
Kunngissarli Frederik suli tunillanneqanngilaq, taannali covid-19 pissutigalugu siorna aasakkut Japanimi OL-ertoqarnerani peqataanngilaq.
Taannami coronamik tunillatsissimasumut qanillisimasuusoq, kunngikkormiut paasissutissiipput. Kunngissaq piffissami tassani tamakkiisumik akiuussuserneqarsimavoq.
