EU-Kommissionip kiassarnermut akit immikkoortinneqarnissaat siunnersuutigigaa

Europami innaallagissamik pilersuinerup aaqqissuuteqqinneqarnissaa, EU-mi kommissionip siulittaasuata, Ursula von der Leyenip kissaatigaa.

Taama kissaateqarnini, Europami naalagaaffiit inissisimaffiat pillugu ukiumoortumik oqalugiarnermini oqaatigaa.

Europami innuttaasut innaallagissamik atuineranni akit pitsaanerunissaat pillugu suliniuteqarnissaq, siulittaasup siunnersuutigaa.

Siulittaasup naqissuserpaa, nukissiuutinik atuinerup ajornarsinerata kinguneranik, atuisut naapertuutinngitsumik atugassaqartinneqalersimasut. Tamanna innaallagissap akiata atuisunut akitsupiloorneranik kinguneqartoq oqaatigalugu, naak pilersuisut suliffeqarfissuit aningaasartuutaat qaffagaarsimanngikkaluartut aamma naqissuserlugu oqaatigalugu.

AAMMA ATUARUK Tysklandimi atomimik nukiliorfiit matuneqarnissaat kinguartinneqartut

Von der Leyenip oqarnera naapertorlugu gassip akiata qaffannerani innaallagissamut akit qaffappoq, tassa Ukrainemi sorsuuttoqalernerani gassip akia qaffammat innaallagissamut aki aamma qaffaneqarsimasoq oqaatigalugu.

EU-p kommissionip siulittaasuata siunnersuutaa alla, tassa pilersuisut iluanaarutaannik atuisut akikinnermik innaallagissamut akiliisinnaalernissaat, Dansk Industrip aamma Dansk Erhvervip qularigaluarlugu, gassip akiata innaallagissallu akiata immikkortinneqarnissaannik siunnersuut tapersersornartippaat.

Europami innaallagissamik atuineq nukissiuutinik atuinermi akisunerpaaq maanna atorneqarpoq tassalu tamanna pissutigalugu gassip akitsornerani innaallagissamut aki aamma qaffanneqarluni. Tassalu tamannarpiaavoq EU-kommissionip allanngortikkusutaa.