Kattuffiit: Suliffeqarfiit nikanarsaalluni tiinganiartarnerup ajoqutai ammasumik oqallisiginerusinnaasariaqarpaat
Suliffeqarfiit nikanarsaalluni tiinganiartoqaqqunagu iliuuserisaat pitsanerusariasqarput. Sulisartut atorfillillu kattuffii AK SIK-lu taama isumaqarput.
Kannguttaatsuliornermik eqqartuussivimmi suliami kingullermi, tassa KNI-p pisortarisimasaata eqqartuunneqarnerani, uppernarsaasut killiliiuminaassimanertik oqaluttuaraat.
AAMMA ATUARUK Peter Grønvoldip eqqartuussissuserisua eqqartuussinerup kingorna: Sullitara pakatsingaatsiarpoq
Suliffimmi nikanarsaalluni tiinganiartoqartarnera ammasumik oqaluuserineqartariaqartoq AK isumaqarpoq. Tamanna politikiliorfigiinnarlugu, imaluunniit suliffimmi najoqqutassianut ilanngutiinnarlugu naammanngitsoq kattuffiup siulittaasua Dina Olsen oqarpoq.
Nikanarsaalluni tiinganiartarnerup naassuiaataa:
Angutit arnallu naligiissitaanissaat pillugu Inatsisartut inatsisaat nr. 3, 29. novembar 2013-imeersoq.
§4. Imm. 2. Inuk kinguaassiuutinut attuumassuteqartunik pissusilersuutinik piumassuserinngisaanik nalaataqartinneqaraangat, inuup pineqartup kanngunarsarnissaanik, nikanarsarnissaanik, assigiinngisinneqarnissaanik imaluunniit nukillaarsarnissaanik sunniuteqartumik siunertaqartumilluunniit, kinguaassiuutitigut peqqusiileqisitsisoqartarpoq.
Najoqqutaq: inatsisit.gl
- Allataannaassanngitsoq kisianni sulisut akuutinneqassasut uagut siunnersuutigaarput. Pinaveersaartitsinissaq anguniarneqassasoq sulisut peqatigalugit, suliffeqarfiup iluani namminneq killissatik ujartussagaat, Dina Olsen oqarpoq.
"Sulisunut politikimi qupperneq ataaseq naammanngilaq"
AK ilaasortami akornanni nikanarsaagaalluni tiinganiarfigitittoqartarnersoq siorna misissuivoq. Ilaasortat quliugaangata ataaseq killini qaangerneqarsimasoq kisitsisit takutippaat.
AAMMA ATUARUK Peter Grønvoldip eqqartuussissuserisua eqqartuussinerup kingorna: Sullitara pakatsingaatsiarpoq
Tamannalu ajornartorsiutaaneranik ersersitsisoq, nikanarsaasoqartillugulu kattuffimmut nalunaarutiginnittarnerup tunuarsimaarfigineqartoq, AK-p siulittaasua oqarpoq.
- Paqumigineqarpoq. Immaqalu qunullutik saaffiginnittanngillat, soorlu killissamik qaangiisunut namminermulluunniit kinguneqartitsisoqarnissaa qunugalugu.
SIK: Sulisut sinniisaat pingaaruteqartorujussuupput
Nikarnarsaalluni tiinganiartoqartassanngippat suliffeqarfiit tamarmik sulisunut sinniisoqartariaqarput. SIK-p siulittaasua taama isumaqarpoq.
- Suliffeqarfiit tamaavimmik sinniisoqartussaapput. Taamaattumik taama pisoqartillugu pingaaruteqarpoq sulisitsisumut imaluunniit sinniisumut nalunaartoqartarnissaa, Jess G. Berthelsen oqarpoq.
- Suliffeqarfinni taamatut misigisaqartoqarpat sukkanerpaamik iliuuseqartoqartariaqarpoq. Sinniisoq sulisitsisorluunniit saaffigaluarlugu qanoq iliuuseqartoqanngippat taava immikkoortortaqarfiit kattuffiilluunniit saaffigineqassapput.
Nikanarsaalluni tiinganiartarnerup inerteqqutaanera pillugu erseqqissumik malitassaqanngitsoq
Arngutit arnallu naligiissitaanissaannut inatsit naapertorlugu nikanarsaaneq, nikanarsaalluniluunniit tiiganiartarneq inerteqqutaavoq.
Suliffeqarfiilli nikanarsaalluni tiinganermut akuersaannginnermik politikeqarnissaannik inatsisitigut piumasaqaateqanngilaq. Tassalu sulisitsisut politikkeqassanerlutik peqassannginnerlutilluunniit namminneq aalajangigassaraat.
Taamatulli aqqusaagalinnut qanoq iliornissamik Transparency Greenland ilitsersuuteqarpoq. Taakku suliffeqarfinnut inunnullu ataasiakkaanut siunnersuuteqarput.
Transparency Greenlandip suliffeqarfinnut siunnersuutai:
- Inatsisinik unioqqutitsisumik, ileqqorluttumik kannguttaatsuliortumilluunniit naammattuuinermi sulisunut iliuusissanik ersarissaagitsi.
- Peqquserluttoqarsoritillugu kinaassutsimik isertuussilluni maalaaruteqarsinnaanermut aaqqissuussaq attuumassuteqanngitsumut suliaritissiuk; ajortumik aaqqiissuteqarneq aaqqiissuteqannginnermiik ajorneruvoq.
- Suliffeqarfimmi pissusilersuutit akuerineqarsinnaanngitsut suunerinik ersarissaagitsi.
Transparency Greenlandip ataasiakkaanut siunnersuutai:
- Inatsisinik unioqqutitsisumik, ileqqorluttumik kannguttaatsuliortumilluunniit naammattuuilluni kiserliortutu misinnarsinnaavoq - assingusumik misigisaqartoqarsimanersoq paasiniaruk, arlaliulluni ataatsimoorsinnaaniassagassi.
- Misigisatit pillugit avataaneersumik oqaloqateqarit, assersuutigalugu kattuffiit, ikinngutit ilaquttalluunniit. Pisoq pillugu allat isumaat tusaaniarlugit.
- Eqqaamajuk nalunaarutiginnillutit saqqummernerit allanngueqataasinnaammat.
