Flemming Rosing Broberg: Inuit inuunerannik annaassisimanerartarpaannga
- Ima tupannartigaaq uanga sumik sussuteqanngikkaluarlunga qujaffigineqartarpunga, allaat inunnit pingasuugunartunit oqarfigineqarnikuuvunga "qujanaq inuunera annaappat “.
24-nik ukiulik Aasiannilu najugalik, Flemming Rosing Broberg, taama oqarpoq.
Taanna katillugit 12.300-inik Facebookkikkut tiktokkikkullu malitseqarpoq. Ilaatigullu videoaqqanik imminut toqunnermik pinaveersaatitsinermut tunngasunik saqqummiisarpoq.
- Imminut toqunneq akiorniarlugu isiginnaagassiaaraq siulleq ikkunnikuuara, taava aappaa imminut toquttoq. Imminu toquttoq sanagakku qisuariartorpassuupput, inuit ilaat qissassimapput amerlasoorpassuillu attortillutik.
Nipangiusimasat oqaluuserineqarlik
Flemmingip videoliaaqqani siulleq maajip pingajuani saqqummersippaa. Aappaa juulip arfineq-pingajuani saqqummerpoq.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Tusaannga pillugu uani paasisaqarnerusinnaavutit.
Taassuma nunatsinni pissutsit paquminarsinnaasut saqquminerusariaqarneri oqaluuserinerusariaqarnerilu isiginnaagassiaaraliortarnerminut tunngavigai.
- Misigissuseq sunaluunniit eqqartorneqanngitsoq qaqillugu eqqartorusuttarakku, taamaammat isiginnaagassiaaraliortarpunga, Flemming Rosing Broberg oqarpoq.
- Pissutigalugu misigigama nunatsinni imminut toqunneq akiorniarneqarnera ersarinnerusinnaasoq nunatsinnilu takutitsisariaqarlunga misigigama, annertuumik sakkortuumillu saqqummersitserusunnikuuvunga.
Siorna imminut toqussimasut 49-sut
Septembarip ulluisa qulingat nunarsuaq tamakkerlugu imminut toqunnissamut pinaveersaartitsinermut 2003-miilli ukiut tamaasa ulloritinneqarpoq.
Suliniaqatigiiffiit marluk the International Association for Suicide Preventionip (IASP) World Health Organizationillu (WHO) suleqatigiillutik ulloq pilersippaat.
WHO-p kisitsisaatai naapertorlugit, nunarsuaq tamakkerlugu imminut toquttut ukiumut 700.000-it missaanniittarput.
Nunami Lesothomi imminut toquttoqarnerpaavoq. Lesothomi inuit 100.000-iugaangata 72,4-t imminut toqussimasutut 2019-imi nalunaarsorneqarput.
Nunatsinnut kisitsisinut nutaanerpaanut sanilliussissagutta, nunatsinni inuit 100.000-iugaangata 73-it imminut toquttutut nalunaarsorneqarput.
Tusarfik: WHO
Mimi Karlsen ( IA) meeqqanut, inuusuttunut ilaqutariinnullu naalakkersuisoq oqarnera naapertorlugu nunatsinni siorna tassa 2021-imi imminut toqussimasut 49-pput imminullu toqunnissamik eqqarsaateqarsimasutut nalunaarsorneqarsimasut 1309-upput.
- Inuusuttorpassuit kisitsisini taakkunani ajoraluartumik ilaapput, tusarnaanngikkutsigillu kisitsisit imminut toqunnermut tunngasut ikilisinnissaannut iluatsitsinavianngilagut, Mimi Karlsen oqarpoq.
Ullumi ulloq, tassa septembarip ulluisa qulingat, imminut toqunnissamik pinaveersaartitsinermut ullorititaavoq.
Taamaammat MIO inuusuttunik suleqateqarluni imminut toqunnissamik pinaveersaartitisinermut tunngasunik naatsunik isiginnaassiorpoq. Taakku Nuummi Katuami septembarip 26-ani takuteqqaarneqassapput.
AAMMA ATUARUK Pinaveersaartitsinermut periusissaq kinguartittoq: Inuusuttut ilanngunneqartariaqarput
Flemming Rosing Brobergilu tamanna pillugu Aasianni inuusuttut peqatigalugit videoliulersaarpoq.
