Kinamit angalasut coronavirusimut misissortissimanissaat EU-mi nunat amerlanerussuteqartut kissaatigigaat

Kinamit EU-mut angalasussat aallannginnerminni coronavirusimut misissortissimanissaat, EU-mi nunat amerlanerussuteqarluartut kissaatigaat.

EU-mi nunat peqqissutsimut ministerii sinnerlugit atorfilittat marlunngornermi ataatsimeereernerisa kingorna nutaarsiassaqartitsivik AFP taama allaaserisaqarpoq.

AFP-p allaaserisaa naapertorlugu ullumi pingasunngornermi ataatsimiikkasuartoqarnissaa pilersaarutaavoq, malittarisassallu suut EU-mi nunanit atuutsinneqarniarnersut tassani aalajangerneqassalluni.

Kina coronavirusip tuniluutilinnginnissaanut killilersuutinik piffissami kingullermi qasukkaaminikuuvoq, kinamiullu nunanut allanut angalasinnaanngornikuullutik. Coronavirusilli Kinami tuniluutilertoqqinneranik tamanna malitseqarsimavoq.

AAMMA ATUARUK Kinami corona tuniluuteqqilermat inuit nakorsaatinik pisiniuttut

Kinamiut assersuutigalugu EU-mut angalanermi coronavirusip allannguutaannik assigiinngitsunik tunillaassuilersinnaanerat nunat EU-miittut ernummatigaat. Coronavirusip allannnguutaannut taakkununnga suli akiuussutissaqannginnertik EU-mi nunat aamma ernummatigaat.

Kinamit angalasut nunamut isinnginnermi coronavirusimik tunillatsissimannginnermik uppernarsaateqarnissaat nunat assigiinngitsut piumasaqaatigilersimavaat.

Tassa Tuluit Nunaat, Frankrig, Spania Italialu tamanna piumasaqaatigilersimavaat.

Kinamit angalasut coronavirusimik tunillatsissimannginnermik uppernarsaateqarnissaannut piumasaqaatit Kinamit ippassaq assuarineqarpoq.

- Taama killilersuisoqarnissaanut ilisimatuussutsikkut tunngavissaqanngilaq, Kinap nunanut allanut tunngasunut ministereqarfiata oqaaseqartitaa Mao Ning ilaatigut oqarpoq.