FN-imi ilaasortat amerlanerussuteqartut russit sakkutuui Ukrainemiit tunuaqqugaat

Ullumi ukioq ataaserpiaq qaangiuppoq Ruslandip Ukraine saassummagu.

Naalagaaffiit Peqatigiinni tassa FN-imi ataatsimeersuartoqarnerani amerlanerussuteqartut isumaqatigiissutigisaannik isumaqatigiissusiortoqarpoq, isumaqatigiissummi Ruslandimut inassutigineqarpoq russit sakkutuutik Ukrainemiit tunuartittariaqaraat.

Isumaqatigiissummi erseqqissumik allassimavoq, Ukrainemi ”sukumiisumik, naapertuilluartumillu aammalu ataavartumik eqqissineqartariaqalersoq”.

FN-ip ataatsimeersuarnerani peqataasut isumaqatigiissusiaq taasissutigisussanngormassuk, nunat 141-t akuersipput. Nunallu arfineq-marluk Rusland ilanngullugu isumaqatigiissummut akerliullutik, nunallu taaseqataanngitsut tassaapput Kina, India, Afrika kujalleq, Iran Pakistanilu.

Nunat arfinillit Ruslandimut illersuisut tassaapput Hviderusland, Korea avannarleq, Eritrea, Mali, Nicaragua Syrialu.

Erseqqissaatigineqarporlu FN-p taamatut isumaqatigiissusiornera aatsaat siullerpaajunngitsoq.

- Ukrainemik tapersersuisuni kisiartaanngilagut. Ukraine tapersersorteqarpoq, danskit nunanut allanut tunngasunut ministeriat Lars Løkke Rasmussen taasereernermi inuit attaveqatigiittarfianni Twitterimi allappoq.