ICC Kalaallit Nunaanni siulittaasunik nikittoqartoq: Hjalmar Dahl tunuartoq
70-inik ukiulik Hjalmar Dahl Inuit Circumpolar Council Greenlandimi ukiuni arfineq-pingasuni siulittaasooreerluni atuuffimmit tunuarpoq.
Inuit Ataqatigiit siulittaasorisimasaat Kuupik V. Kleist ICC Kalaallit Nunaannut siulittaasunngorpoq.
ICC Kalaallit Nunaata ataatsimeersuarnerani naammasseqqammertumi tamanna aalangerneqarpoq.
- 1977-imi pilersinneqarpoq.
- ICC suliniaqatigiiffiuvoq naalakkersuisutiguunngitsoq, tassannga naggueqatigiit Inuit soqutigisaat ineriartortinneqarnissaat aamma nunat tamalaat akornanni pisinnaatitaaffii sulissutigineqartarput.
- Suliniaqatigiiffiup Alaskami, Canadami, Kalaallit Nunaanni Chukotkamilu (Rusland) naggueqatigiit inuit 180.000-it pillugit suliaqartarpoq.
Hjalmar Dahlip soraarninngornissani paasissutissiissutigaa.
KNR-ip Hjalmar Dahl apersorniaraluarpaa, apersorneqarumanngilarli.
KNR-ip aamma siulittaasunngortoq Kuupik Kleist apersorniaraluarpaa, aammali taanna maanna apersorneqarumanngilaq.
Pisorli pissusissamisoortumik ingerlasoq taakkua marluullutik paasissutissiissutigaat.
ICC Kalaallit Nunaat siulittaasumik qinersinertalimmik ukiut sisamakkaarlugit ataatsimeersuartarpoq.
Inuit Circumpolar Councilip ataatsimeersurneri Issittumi nunanit tamanit peqataaffigineqartartut sioqqullugit ICC Kalaallit Nunaat ataatsimeersuartarpoq.
ICC Kalaallit Nunaat suliniaqatigiiffimmut naalakkersuisunut arlaannut attuumassuteqanngitsumut nunanit tamalaanit ilaasortaaffigineqartumut Inuit Circumpolar Counsilimut ilaavoq. ICC naggueqatigiit Inuit pisinnaatitaaffiinik soqutigisaannillu siuarsaanissamut suliniaqatigiiffiuvoq.
Siulittaasup allanngornerata saniatigut Nuka Kleemann ICC-miiginnarpoq. Aviâja Egede Lynge, Ululinannguaq Kleist Aviaaja Lennert Olsenilu ICC Kalaallit Nunaannut ilaasortat sinneritut qinerneqarput.
