Frankrig sakkussianik Danmark suleqatigalugu Ukrainemut nassiussiniartoq

Danmark suleqatigalugu qamutilinnik amerlanerusunik Ukrainemut nassiussiniarlutik, Frankrigip præsidentia Emmanuel Macron oqarpoq.

Qamutilinnik arfinilinnik Ukrainemut nassiussinissaq pillugu isumaqatigiinnialeruttorpugut, Macron, qamutilinnik sumiiffimmiit sumiiffimmut nuunneqarsinnaasunut tunngatillugu oqarpoq.

Danmarkimi illersornissamut ministereqarfia Macronip oqaasii pillugit nutaarsiassaqartitsivimmut Ritzauimut pingasunngornermi unnukkut oqaaseqarumanngilaq.

- Suliniutit assigiinngitsut isertuussassaammata illersornissamut ministereqarfik sakkussianik tunissuteqarnissaq pillugu oqaaseqarsinnaanngilaq, ministereqarfik mailikkut allappoq.

AAMMA ATUARUK Danskit illersornissaqarfiat qamutinik sorsuutinik aallartitsilertoq

Nunat killiit illersoqatigiiffiannni NATO-mi nunat illersornissamut ministerii Bruxellesimi pingasunngornermi ataatsimiipput, nunat NATO-miittut sakkussianik Ukrainemut nassiussiniarnerat tassani eqqartorneqarluni.

Danmarkip illersornissamut ministeria, Morten Bødskov, Danmarkip sakkussiatigut ikiorsiiniarnera pillugu tassani oqaaseqarpoq. Itinerusumilli oqaaseqanngilaq.

- Sakkussiat suut tunissutiginiarneqarnersut pillugu oqaaseqarsinnaanngilanga. Ukrainelli illersornissamut ministeriata Danmarkip suleqataaneranik tunissuteqarneranullu nuannaaruteqartorujussuunera oqaatigisinnaavara, Morten Bødskobv oqarpoq.