Gorbatjov persuarsiutiginagu ilisaasoq
Ruslandimi præsidentiusimasoq Mikhail Gorbatjov, nunani killerni inunnit amerlasuunit nersorniarneqartoq, ullumi ilisaassaaq. Persuarsiutiginagu ilisaassaaq, naak Sovjetunioniusimasumi Ruslandimilu naalakkersuinikkut siuttut taama ilisaasaraluartut.
Ruslandip præsidentia Vladimir Putin Gorbatjovip ilisaaneranut peqataanavianngilaq. Sovjetunioniusimasummi atorunnaarnera politikkikkut kukkuluttortoqarneratut taassuma nalilernikuummagu.
Putinip Gorbatjovimik illuatungiliinini takutinniarlugu Gorbatjovip persuarsiutiginagu ilisaanissaa aalajangerpaa. Ullumi arfininngornermi allamik suliassaqarnini pillugu ilisinissamut peqaataannginnissani sapaatit-akunnerata massuma ingerlanerani nalunaarutigaa. Tamanna pillugu siusinnerusukkut taanna ilerfiarpoq.
Pissutsit nalinginnaasuugaluarpata nunani killerni qullersat amerlasuut Gorbatjovip ilisaanissaanut peqataajartorlutik Moskvaliassagaluarput.
Ukrainemi sorsuttoqarnera, Ruslandimullu pillaatitut kingorna iliuutsit tamanna allanngortippaa. Nunani killerni nunat assigiinngitsut aallartitatik ilisinermi tamanna pillugu peqataatippaat, assersuutigalugu præsidentit ministeriunerillu peqataanatik.
Kommunistit ukiuni qulikkaani sisamani aqutsereersullu Europap kangisissortaani assigiinngitsutigut kiffaanngissuseqarnerulernissaq pillugu suliniuteqarnini Gorbatjov nunani killernit taamanikkut nersorniarneqalerpoq. Tysklandip kattussinnaanissaanut aqqutissiuivoq, Europallu kangisissortaata kitaatalu suleqatigiinnerulernissaat aqqutissiuullugu, assersuutigalugu atomimik qaartartorsuarnik ikilisaasoqarnissaa suliniutigalugu.
Sovjetunioniusimasoq 1991-imi atorunnaarmat, nunallu immikkoortui 15-it namminersulerusummata, Gorbatjov politikkikkut soriarsinnaanngitsutut inissisimalerpoq. Gorbatjov qullersatut ukiut arfinillit atareerluni Sovjetunioni atorunnaarpoq.
Ruslandip Ukrainemik saassussinera quarsaarutigalugulu aalassassimaarutigigaa, Gorbatjovip ukiorpaalunni ikiortaata nutserisuatalu oqaatigaa.
- Aliatsaatigilluinnarpaa, Pavel Palasjtenko oqarpoq.
