Hans Egedemut susoqartoq-una? Ilisimannittoq ataaseq politiit amigaatigaat
Ukioq ataaseq qaammatillu arfineq pingasungajaat qaangiummata nuummiut itileriallartut Hans Egedemut eqqaassutissaq qalipanneqarsimasoq. Tamanna pivoq sapaammi seqinarissuarmi 21. juunimi, Kalaallit Nunaata inuiattut ullorsiorfiani.
Serlersaanerup nunasiaajunnaarnissaq, Danmarkimut ataneq, danskit naalagaanerat, kulturiat ileqquilu pillugit oqallinnerujussuaq aallartippaa, aasap sinnera ingerlasoq.
Pinerlussimanermik paasiniaaneq pillugu makku nalunngilavut:
* Inuusuttu sisamat, angutit marluk aamma arnat marluk, suliami unnerluussaapput. Eqqaassutissaq qalipanneqaqqammiinnartoq tamanna pivoq.
* Tamarmik Pisortat pigisaannik assigisaannilluunniit serlersaasimasutut Pinerlunneq pillugu Inatsimmi paragraf 46 naapertorlugu unnerluunneqarput.
* Tamarmik sisamaallutik pinngitsuunerarput.
Tigusiffik: KNR
Kisianni kinaana eqqaassutissamik qalpaammik aappalaartumik kuisisoq ajoqersuiartortitallu palasitut annoraarsua inuit kakioriaasitoqaannik seqitsaraa?
Aasaq politiit oqarput paasiniaasut misissuinerminnik naammassinninnissaminnutt ilisimannittoq ataaseq amigaatigigaat. Ajoqutaaginnartorli ilimannittup nunami allamiinnera. Suliarooq inatsisilerituunut piariilerpoq, taamani taama nalunaarput. Taakkumi naliliisussaammata eqqartuussivimmut suliassanngorrinneqassanersoq imaluunniit suliassanngortinneqassannginnersoq.
Taama oqarneranniit qaammatit arfineq pingasungajaat qaangiupput, sulilu nalunaarut taamaappoq. Ilisimasalik nunami allamiipppoq, paasiniaasunullu ajornartorsiortitsilluni.
Periaatsit pisariusut piffissaajarnaqaat
Politiit nunami allami misissuissappata malittarisassat Kalaallit Nunaanni pinissaanit allaanerujussuupput. Unnerluussisussaatitaaneq Morten Nielsen taama oqarpoq:
- Ilisimannittut naalagaaffeqatigiinnerup avataaniittut apersussagaanni nunat allat pisortatigut oqartussaat aqqusaartariaqarput.
AAMMA ATUARUK Eqqaassutissamik serlersaarisoqarsimaneranut ilisimannittoq ataaseq kisimi politiinit amigaataalersoq
Sooq nunamut ilisimannittup najugaanut sianertoqaannarsinnaanngila taannalu oqaloqatigumallugu?
- Nunat assigiinngitsut pisortatigut oqartussaasa akornanni suleqatigiinneq isumaqatigiissuterpassuarnik tunngaveqarpoq. Allaat naalagaaaffeqatigiinnerup iluani inatsisit assigiinngissuteqarput, taamalu suliat ilaatigut piariusinnaallutik, Morten Nielsen oqarpoq.
Tamakkut piffissaajarnarsinnaapput, unnerluussisussaatitaneq oqarpoq. Imaassinnaavormi nunami tassani politiit aamma eqqartuussisoqarfiit ilanngutitinneqartariaqartut ilisimannittumut attaveqarsinnaanissamik pisinnaanerannik akineqartinnatik.
Nunat assigiinngitsunik inatsiseqarlutilu malittarisassaqarput. Imaassinnaavoq pinerlunneq maani inerteqqutaasoq nunamili allami inerteqqutaanani. Taamaattumik Morten Nielsen naapertorlugu nuna alla suliamik paasinnissimalluartariaqarpoq paasiniaanermut ilaarusunnerminik aalajangiussitinnani.
"Ilisimannittoq qanoq oqaasissaqarnersoq tusartariaqarparput"
Unnerluussisussaatitaanerup pineqartup sumiinnera, imaluuniit politiit attaveqarfigineraat oqaatigiumanngilaa.
Ilismannittoq taanna sooq-una taama pimgaaruteqartigisoq?
- Ataatsimut isigalugu suliap qanoq pineqarnissaanik naliliiniarluta ilisimannittup taassuma qanoq oqaasissaqarnera pisariaqartipparput.
AAMMA ATUARUK Hans Egedep eqqaassutissaa pillugu taasineq naammassivoq: Eqqaassutissaq uninngaannassaaq
Tassa ingerlariaqqinnissamut pingaarluinnartuuvoq?
- Nassuiaat pisaraqavipparput pisup tamakkiisumik isigisinnaanissa pillugu.
Ilisimannittoq taanna attaveqarfigineqarsinaanngippat qanoq pisoqassava?
- Taava killiffimmiit naliliilluta isummissaagut..
Qanoq sivisutigisumik misiliiniarpisi? Massakkummi sivitsorpoq?
- Isumaqartullugu misiliiuassaagut. Qanoq ilinersoq naammannersoq naliligassaasarpoq. Suli tassunga killinngilagut.
Hans Egedemut eqqaassutissaq aatsat serlersaarfigineqanngilaq.
Eqqaassutissaq siullermik 1973-imi qalipaammik aapplaartumik kuineqarpoq, ukiullu ingerlaneranni arlaleriarluni assigisaanik serlersaarfigineqartarpoq.
