Hans Egedep eqqaassutissaanik serlersaarnerup paasiniarneranik politiit innuttaasut ikiortiseraat
Nuummi sissiugatoqqap eqqaani ulloq 25. marsi Hans Egedemut eqqaassutissap serlersaarfigineqarnera kingulleq kimit ingerlanneqarsimanersoq politiinut suli paasiuminaappoq.
AAMMA ATUARUK Hans Egede serlersaarfigineqaqqittoq
Politiit ilisimannittunik apersuereerput, kisianni kia serlersaarsimaneranik paasisaqarnerulersitsinngilaq.
Politikommissær Jan Geisler KNR-imut taama oqarpoq.
- Paasiniaanitsinni periarfissaaruppugut, oqarpoq.
Taamaattumik politiit innutaasunut ingerlaqqinnissaminnut ikioqqullutik saaffiginnipput. Ilaatigut politiit facebook-imi qupperneranni, Jan Geisler nalunaarpoq.
Tassani politiit ilisimannittunik nutaanik imaluuniit serlersaarinermut ilisimasalinnik ujaasipput.
Qalipaat aappalaartoq atorlugu serlersaarineq
Sapaatip akunnerani siuliani 25. marsi Nuummi Hans Egedemut eqqaassutissaq serlersaarfigineqaqqippoq.
Eqqaassutissap toqqaviani qalipaammik aappalaartumik ”live laugh landback” allanneqarsimavoq.
Land Back tassaavoq USA-p Canada-llu inoqqaavisa nunaminni nunasiaasimasumi politikkikkut aningaasaqarnikkullu oqartussalernissaannut suliniut.
Kalaallit inuiattut ullorsiornerannni 21. juuni 2020-mi eqqaassutissaq aamma qalipaammik aappalaartumik serlersaarfigineqarpoq . Tassani ajoqersuiartortup palasitut annorarsua inuit qangatut kakiuinerinik seqqartarneqarsimavoq toqqavianilu “decolonize” allanneqarsimalluni.
