Hans Petersen qulimiguulimmik ujaasinermi nassaarineqanngilaq
Annaassiniarnermi qulimiguulik atorneqartartoq ippassaq ujaasigaluarpoq, iluatsinngitsumilli. Tammaaneqartoq Hans Petersen Aasianneersoq suli nassaarineqanngilaq.
Politiit angallataat Kimik imaatigut ujaaseqataagaluarpoq, aammali 24-nik ukiulik nassaarinagu.
Ujaasineq ingerlatiinnarneqartoq, Kalaallit Nunaanni Politiit nalunaarutigaat, taakkulu Aasiammiutit quiminnik, toqqorsivimminnik assigisaanilu parnaaqqanngitsuni ujaasinissaannik kaammattuuteqarfigeqqippaat.
AAMMA ATUARUK Ujaasineq annertusineqartoq: SAR-imik ujaasinermi Hans Petersen qulimiguulimmik ujaarineqassaaq
Hans Petersen ilaquttaminit oktobarip ulluisa 15-ianni arfininngornermi nalunaaqutaq 22.47 maqaasineqartutut nalunaarutigineqarpoq. Taakku angut 24-nik ukiulik Aasianni ilinniartut ineqarfianni inigisaminit arfininngornerup ullaasaani nalunaaqutap sisamat missaani animmalli tusarfiginagulu takoqqissimanngilaat.
Politiit oqarnerat naapertorlugu Hans Petersen ”nikallungalluni” anisimavoq.
Hans Petersen 165 centemeterip 170 centimeterillu akornanni angissuseqarpoq, naatsunik qernertunik nujaqarpoq, kingullermillu takuneqarami teqqiaq qernertoq, kavaajaq Arcteruximik meqqilik tungujortumik taartumik qalipaatilik, tujuuluk qaqortoq qarliillu qernertut atorpai.
Angut takuneqarsimaguni politiit oqarasuaammut 70 14 48-mut attavigineqarsinnaapput.
