Ikiueqqaallammak: Kikkut tamarmik ikiueqqaarsinnaasariaqaraluarput

Kalaallit Røde Korsiat 2021-mi ikiueqqaallammammik toqqaavoq, toqqarneqartorlu tassaavoq Niaqornaarsummiu 53-nik ukiulik Agnethe Søholm. 

Nersornaasiineq nersornaaserneqartumut 10.000 koruuninik aningaasartaqarpoq

- Tupannarpoq taavalu aalassannarluni, Agnethe Søholm oqarpoq.

Siorna juulip arfineq-pingajuat Agnethe Søholmimut inuttulli allatut ulluuvoq nalinginnaasoq.

Uini erngutartillu sisamanik ukiulik umiatsiaqatigai, pisoqariartaarporli.

-Umiatsiap initaani ernutannguarput nerisippara. Tunumut qiviarama takulerpara uiga tunumut qiverluni nivertoq.

- Ingerlaannaq anillappunga takusinnaavaralu appaasoq tassa anersaartorunnaarsimasoq, Agnethe Søholm oqaluttuarpoq.

AAMMA ATUARUK Ikiueqqaarneq nunatsinni ilisimaneqanngippallaarpoq

Asimiilluni allamik isumalluutissaqarani taamatut pisoqariataarnerani imminut aqunnissaq pisariaqarluinnartoq, taanna oqaluttuarpoq. Aappariit Puerlup nalaaniipput, tassa Niaqornaarsummiit 70 kilometerinik avasitsigisumiittumi.

- Uippallernaveersaarpunga qujanartumillu uippallinngilanga, oqaluttuarpoq.

-Paasilertorpara uanga iliuuseqartussaallunga. taamaalimmat uummarsarlugu aallartippara, tassami uanga iliuuseqanngikkuma annaasussaagakku, Agnethe Søholm oqarpoq.

Agnethe ukiut 15-t matuma siorna ikiueqqaarnermik ilinniarsimavoq. Ukiullu arlallit qaangiutereeraluartoq ilikkarluarsimavaa.

- Sivisuumik uummarsarpara, taamaaliortuarpungalu uummartinnissaata tungaanut.

- Nukittuniaqalunga uippallernangalu uummartippara, uummarmat kivissinnaannginnakku tuiatigut tigullugu tunuporsorlunga umiatsiap initaanut eqquppara qipittorlugulu, Agnethe Søholm oqarpoq.

AAMMA ATUARUK Kalaallit Røde Korsiat namminneq kajumissutsiminnik sulisussaaleqisoq

Uummarsaannanngilaa, aammali umiatsiaq aquttariaqalerpaa.

- Oqarusuppunga minnerunngitsumik asimukartarniaraanni nammineerluni umiatsiamik aqussinnaaneq pisinnaasariaqarpoq nammineerlunilu akisussaaffimmik tigusilluni inoqarfiusumut ingerlassisinnaasariaqarpoq arnaagaanni angutaagaanniluunniit.

- Isumaqarpungalu kikkunnilluunniit angalaqataasartunit sungiusarnissaa ilinniarnissaalu pisariaqartoq, Agnethe Søholm oqarpoq.

Kalaallit Røde Korsianiit isumaavoq, inuit marluugaangata aappaa ikiueqqaarnermik pikkorissarneqarsimasariaqartoq.

Pingaaruteqarluinnarpoq erngerluni eqqortumik inuunermik annaassinissamik pikkorissarsimanissaq, inuunermillu annaassisinnaanissaq, suliniaqatigiiffik isumaqarpoq.