RAL-imi sulisut sinniisaat: Sooq ajornartorsiutaanngitsoq allanngortinneqassava?
Royal Arctic Linep Aalborgimi containerinut assartuussiviani sulisut ukiortaami soraarsitaanissartik pakatsissutigaat. Umiarsualiviup ukiorpassuarni ingerlalluartup atorunnaarnissaa paasiuminaatsikkitsik sulisut sinniisaata Frank Jensenip KNR-imut oqaatigaa.
- Ukiuni 50-ini ajunngitsumik ingerlasup allamut nuunneqarniarnera paasiuminaatsipparput,
Frank Jensen oqarpoq. Taanna RAL-ip Aalborgimi umiarsualiviani sulisut 100-t missaanniittut ukiortaami soraarsitaasussat sinniisoraat.
2022-p affaani siullermi soraarsitsiortortoqassasoq RAL-ip nittartagaani atuarneqarsinnaavoq.
Umiarsuaateqarfiup Aalborgimi containerinut assartuussivini, quersuani sullivinilu matussammagu soraarsitsiortortoqassaaq. Danmarkip nunattalu akornini assartuineq Aarhusip umiarsualiviatiguulissalluni.
- Sulisut soorunami nikallungapput. Amerlasuunimmi sulisoqarpugut. Grønlandshavni ukiuni 50-ini Aalborgimiippoq sulisorpassuaqarpugulli sivisuumik atorfeqareernerminni akissarsiatigut qaffasissumik inissisimalersimasunik. Sulisut arlallit umiarsualivimmi ukiut 40-t sinnerlugit atorfeqarnikuupput aningaasarsiorfimminnillu arsaagaasutut pissagamik nikallunganerat paasinarpoq, Frank Jensen oqarpoq.
AAMMA ATUARUK RAL-ip Aalborgi 2022-mi taliffinnaariunnaassavaa
Royal Arctic Linep Aalborgillu umiarsualivia, Port of Aalborg, 2022-mi kiffartuussinissamik isumaqatigiissutaat qaangiutissaaq. Taakku isumaqatigiissutip nutarternissaanut ukiut arlallit isumaqatiginninniaraluarput. Sivitsuinissamillu isumaqatigiissusiortoqanngilaq.
Isumaqatiginninniarnissaq siunertaqanngitsoq
Isumaqatigiissummik sivitsuisoqassannginnera sivitsortumik ilisimaneqareeraluartoq sulisut qassit soraarsinneqassanersut sapaatit akunnerata siuliani aatsaat saqqummiunneqarpoq.
Soraarsitsiortortoqassatillugu isumaqatiginninniartoqassasoq danskit inatsisaanni allaqqavoq. Tamannalu januaarip aallartilaarnerani pissaaq.
- Aap, suliffeqarfik isumaqatiginiartussaassavarput. Qanoq takorluugaqarnersut Aalborgimilu sulisut qanoq pineqassanersut isumaqatiginninniutigisussaassavarput.
AAMMA ATUARUK Neqeroorutigineqarsinnaasut tamaasa RAL-imut neqeroorutigaagut
Sulisut peqatigiiffiat suleqatigilluarparput, taamaammat sulisut ilaat pikkorissartinneqarsinnaassapput, Frank Jensen oqarpoq.
Angusaqangaarnissarli taassuma qularaa.
- Isumaqatiginninniarnerarpugut isumaqatiginninniavissanersugulli nalunarpoq, Frank Jensen oqarpoq.
