Ilisimatuut amerluummik misissuiartorlutik Tasiilamukartut

Nunatsinni amerluutit pillugit annertuumik ilisimatusartoqarnikuunngilaq.

Taamaammat Herlevip Gentoftellu napparsimmavianit peqqissutsimik ilisimatusartut kalaallit inuiannit allanit amerluuteqarnissamut sanngiinnerunersut misissoriartorlugit Tasiilamukangajalerput.

Ilisimatuut maannamut ilisimariigaat tassaavoq nunatsinni meeqqat arfinillit tikillugit ukioqartut akornanni eksemimik amerluuteqartoqakkajuttartoq. Meeqqat eksemiisa atopisk eksem taaguutigivippaa.

Meeqqat pingasuugaangata ataaseq atopisk eksemeqakkajuttarpoq – meeqqallu naggueqatigiinnik inunneersut taama amerluuteqarnerusartut 2019-2020-mi misissuinerup takutikkaa, sermitsiaq.ag allappoq.

Nuummi, Sisimiuni Qaqortumilu ulluunerani paaqqinniffinnit assigiinngitsunit 34-nit meeqqat 839-t misissorneqarput. Taakkulu 28 procentii apotisk eksemeqartut – 34,5 procentii taama amerluuteqarnikuupput.

Danmarkimi ukioqatigiiaani taakkunani taama amerluuteqartut 15-imit 25 procentiupput.

Inersimasunngornermi amerluuteqaannartut

Taakku ilaat inersimasunngornerminni amerluuteqaannartartut, Herlevip Gentoftellu Napparsimmaviani nakorsaq, Morten Bahrt Haulrig oqarpoq.

- Taamaammat Kalaallit Nunaanni amerluuteqartut amerlanerat ilimagaarput, taanna KNR-imut oqarpoq.

Aammattaaq kontakteksemimik taaneqartartumik tassa assakkut eksemeqartut amerlasut misissuinerit ataasiakkaat takutippaat. Amerluuteqarnermulli tunngatillugu annerusumik misissuisoqarnikuunngilaq.

- Tamanna misissorusupparput, Morten Bahrt Haulrig oqarpoq.

Morten Bahrt Haulrigip nunatsinni amerluutit suut amerluutigineqarnersut kalaallillu qanoq amerlatigisut amerluuteqarnersut qulaajarnissaa neriuutigaa.

Tasiilami katersortarfimmi maajip ulluisa sisamaannit qulinganut misissuisoqassaaq.

Peqqissutsimik ilsiimatusartut amerlasuunit peqataasoqarnissaa neriuutigaa. Peqataanissamut 18-inik ukioqalereersimanissaq piumasaqaataavoq, amerluuteqarsimanerli amerluuteqarsimannginnerlu apeqqutaanngilaq.

Amerluutigisamik ajornartorsiuteqarneq takutinneqassappat Tasiilami napparsimmavik suleqatigalugu nakorsaasersuisoqassaaq.