Ilisimatuut paasisaat: Nunarsuarmi qeqertat avannarpasinnersaat sikuuvoq

Nunarsuarmi qeqertat avannarpasinnersaat Qeqertaq Avannarleq qeqertaanani sikuuvoq ujaqqanik sioqqanillu qalleqqasoq.

lisimasassarsiorluni angalanermi Leister Go North 2022-mik taasami aggustip qaammataani pisumi tamanna paasineqartoq, atuagassiami Videnskab.dk - mi taama allaaserineqarpoq

Qeqertaanasorineqartoq, danskit schweisimiullu ilisimasassarsiiortuinit nalaatsornikkut siorna paasineqarpoq, nunarsuarmilu qeqertat avannarpasinnerpaajunasorineqarluni.

Tamanna nunarsuarmi tamarmi aalassassutigineqarpoq.

Danmarkimi teknik pillugu ilisimatusarfimmi DTU-mi professoreq René Forsberg siorna ilisimasassiornermi peqataavoq

Ilisimatuut aggustimi ilisimasassarsiornerminni sumiiffiit assigiinngitsut tikippaat, ukiullu kingulliit qeqertat qulit sumiiffinni assigiinngitsuniittut nalunaarsorneqarsimasut tikinneqarsimasut taassuma nassuiaatigaa.

Qeqertat taakkua eqqaanni immap itissusia ekkolod atorlugu siullermeerlutik misissorneqarput. Siornatigullu ekkolod atorlugu misissuisoqarnikuunngilaq, tamanna immap sikuanik meterisut marlunnik pingasunilluunniit qalleqqasarmata, Rene Forsberg atugassiami Videnskab-dk-mi taama nassuiaateqarpoq.

Inuppassuarnit alutorneqartoq

- Misissuinitsinni paasivarput qeqertaanasorisatta ataani imaqartoq. qeqertaasorineqartullu sikuupput, ujaraalunnik sioqqanillu qallerneqarsimasut, Rene Forsberg taama oqarpoq taannalu tupaallassimanerarpoq, atuagassiami Videnskab.dk-mi taama issuarneqarpoq.

Qularutissanngitsumik nunarsuarmi qeqertat avannarpasinnersaat sikuuvoq, taanna taama nassuiaateqarpoq.

- Immap naqqanit alliartorlutik qeqertanngorsimasinnaanngillat, sikuupput ujaqqanik sioqqanillu qallerneqarsimasut, René Forsberg KNR-imut taama oqaluttuarpoq imalu nangilluni.

- Sikut Kalaallit Nunaata avannarpasinnersaata Kap Morris Jesupip kitaanit sermimit iigartartuneersuusut kingorna takuagut, taakkua sermimit iigartartuneersuunissaat ilimanaateqarput, tamaanilu ilualiat saattut arlaqartut aamma takuagut taakkua nunaminernik ujaqqanillu qallerneqarsimapput qeqertatut isikkoqarlutik.

Ilisimatuut ilisimasassarsiorlutik aallaramik nunarsuarmi qeqertat avannarpasinnersaannut tikissallutik naatsorsuutigisimagaluarput.

Taamaattumik René Forsberg ilisimasassarsiortullu tupaallapput

- Ilisimasassarsiorlutik angalaqataasut ajunngitsumik tiguaat, naak siunissami nunarsuarmi qeqertat avannarpasinnerpaartaattut nalunaarsorneqarsimanissaa naatsorsuutigisimagaluarlugu.

Qeqertaq Inuit Qeqertaat maanna nunarsuarmi qeqertat avannarpasinnerpaartaraat, taanna qallunaatut taaguuteqartinneqarpoq Kafffeklubben Ø

Qeqertaanarsorineqartut qeqertaanngitsullu paasineqarnerisa kingorna nunap assingani Kalaallit Nunaata assinga allannguuteqalaassaaq.