Peqatigiiffik aningaasaliinissaraluamut: Paatsoortoqarnera pakatsinartorujussuuvoq
- Isumaqarpunga pakatsinartorujussuusoq taama annertutigisumik paatsoorneqarsinnaammat, Dorthe Qvist Jerimiassen oqarpoq.
Taanna Peqatigiiffik Illorsuarmiuni siulittaasuuvoq. Peqatigiiffik Uummannap sulluani 2017-imi tassaarsuaqarnerata kingorna Illorsuarmiunit nuutsitaasimasunit pilersinneqarpoq. Illorsuit maanna inuerutsitaanikuuvoq.
Karrat Kangerluanni piffiit pingasut aarlerinaateqartut
Nunatsinnit, Danmarkimit Norgemiillu ujarassiuut Karrat Kangerluani piffiit pingasut aarlerinaateqartutut oqaatigaat. Taakku qaqqami 2017-imi nakkaasoqarneranit tassaarsuaqartitsisumut qanittumiipput. Piffiit assimi normu 1, 2, 3-millu nalunaarsorsimapput. Piffik 3-mik nalunaaqutsersimasoq ataatsikkut nakkaassagaluaruni ajornerpaamik pisoqarsinnaavoq.
Danskit aningaasanut aappagumut inatsisissaannut Siumut folketingimut ilaasortaatitaata Aki-Matilda Høegh-Damip isumaqatiginninniarnermini ukiumut 500.000 koruunit peqatigiiffimmut aningaasaliissutigineqartassasut iluatsikkaluarpai.
Aningaasat ukiuni sisamani tulliuttuni aningaasaliissutissat katillugit to millionit koruuniusut Naalakkersuisunit itigartitsissutigineqarput.
Danskit aningaasaqarnermut ministereqarfiata Naalakkersuisunut aningaasat atorneqarnissaat saaffiginnissutiginerini Illorsuit ammaqqinnissaannut atorneqassasut Namminersorlutik Oqartussat paasivaat. Illorsuillu tassaarsuaqaqqissagaluarpat aarlerinartumiimmat Naalakkersuisut aningaasaliissutit itigartippaat.
AAMMA ATUARUK Paatsooqatigiinneq peqatigiiffimmut millioninik naleqartoq
Aningaasaqarnermut naalakkersuisup Naaja Nathanielsenip (IA) KNR-imut siunnerusukkut tamanna nassuiaatigaa. Peqatigiiffiullu suliniutaasa aningaasaliiffgineqarnissaat akerlerinagu KNR-imut siusinnerusukkut oqarpoq.
- Illorsuarni pisussanut aningaasaliisoqassasoq uagut paasivarput, tamannalu tapersersinnaasimanngilarput. Peqatigiiffimmut aningaasaliisoqarniarnera tapersersorusunnartorujussuuvoq, ilaasortanullu aaqqissuussinerit Illorsuarmi pisussaanngitsut ajoriffissaqartinngilavut. Tassa paatsoorneq aallavigalugu taamaattoqartoq ugguarnarpoq.
Inatsisilerituumut tarnip pissusianut ilisimasalimmullu atorneqarniaraluartut
Dorthe Qvist Jerimiassen oqarnera naapertorlugu, Peqatigiiffik Illorsuarmiut suut kissaatiginerlugit Naalakkersuisunut anngunnikuuaat. Tassalu Illorsuarmi aaqqissuussanut aningaasat atorneqassannginnerarlugit.
AAMMA ATUARUK Karrani ulorianartoq: Nuukkusuttut suli nuunngitsut
- Nassuiaatitsinni ersarilluinnaqqeqqissaareeraluarmata tamarmik. Qanoq imaqarnersut qinnuteqaatigisimasagut (Naalakkersuisunut aaqq.), Dorthe Qvist Jerimiassen oqarpoq.
Illorsuarmiut nuutsitaanerminni pisinnatitaaffitik unioqqutinneqarsimanersut inatsisilerituumit misissorneqarnissaanut aningaasat aamma atorfissaqartikkaluarpaat.
- Ilaat najugassaminnik tunineqarnikuupput ilaalli angerlarsimaffissaminnik tunineqarnikuunatik. Taannaannarluunniit eqqarsaatigalugu nikinganerujussuuvoq assigiinngisitsinerullunilu, Peqatigiiffik Illorsuiarmiut siulittaasuat Dorthe Qvist Jerimiassen oqarpoq
