Illuatungiliuttut Mútep oqalugiaataanut: Nutaarsiassartaqarpallaanngilaq

Naalakkersuisut siulittaasuata Múte B. Egedep, ukiortaami oqalugiaataa Siumup Atassutillu siulittaasuisa nutaarsiassarsiffiginngilaat.

Oqalugiaat Naalakkersuisut qanoq suliniarnerisa oqaluuserinerannik amigaateqartoq, Atassut isumaqarpoq. Siumullu oqaatsinut uteqattaakkanut qatsussivoq.

- Oqariartuutai nutaarsiassartaqarpallaarujussuanngitsutut isumaqarfigaagut, Siumup siulittaasua, Erik Jensen oqarpoq.

AAMMA ATUARUK Muté B. Egedep ukiortaami oqalugiaataa: Siumukarneq, naligiinneq ataqatigiinnerlu

Atassut ukiortaami oqalugiaammut aamma pakatsissuteqarpoq. Partiip siulittaasua isumaqarpoq, nunap siuttua siunissap qanoq ikkumaarneranik aamma suut suliarissallugit iluamik nassuiaanngitsoq, pisimasunillu qaangiutereersunik imaqarnerusoq.

- Tassa taanna angusimasanik assigiinngitsumik taaguinerugami, annertungaatsiartumik. Siunnerfiit sorpiaanersut Naalakkersuisut siulittaasuannit annerusumik naatsorsuutiginerusimagaluaratsigit, Partiip siulittaasua, Aqqalu C. Jeremiassen oqarpoq.

Erik Jensenip Naalakkersuisut siulittaasuata suleqatigiinnissamik patajaatsuunissamillu oqalugiaammini kaammattuutaa maannamullu sulinermini takutitai imminnut assortuuttutut nalilerpai.

- Ammasumik ingerlatsissaagut kisiannili ammasumik ingerlatsisoqarpa? Aatsaat taamak matoqqatigipput. Naalakkersuinikkut taarseraatinngitsumik inuiaqatigiit ingerlanneqartariaqarput, siuttoqalertariaqaput aatsaat taamak oqaluttuarisaanermi piffissami sivikitsigisumi Naalakkersuisut taamak nikeraatsigilerput, Erik Jensen oqarpoq.

Atassut: Qanoq aningaasarsiussaagut?

Illuatungiuliuttut siulittaasuisa marluk, oqalugiaat pitsaanerpaap ajornerpaallu qeqqannut inissippaat.

Atassut inuit atugarissaarnissaat Naalakkersuisut siulitaasuata oqalugiaataani initummata nuannaarutigigaluarlugu tamanna qanoq aningaasalersorneqarniarnersoq paasinngilaa. Aningaasarsiorfissanillu tikkuaasimasariaqaraluartoq oqarpoq.

- Inuit atugarissaassappata suna tamarmi aningaasatigut malitseqartarpoq. Taamaattumik amigaatiginartippara siunissamut isiginerusumik, suna siunnerfiua? Suna inuiaqatigiittut naatsorsuutissaava? Aqqalu C. Jeremiassen oqarpoq.

Siulittaasulli taakkua marluk, Naalakkersuisut siulittaasuata, ilaqutariinneq pitsaanerusoq ineqarnermullu tunngasut ilaatigut pingaartillugit eqqaamagit iluarisimaarpaat.

Demokraatit upperinninngillat

Demokraatit siulittaasuata, Jens-Frederik Nielsenip Naalakkersuisut siulittaasuata, Múte B. Egedep ukiortaami inuiaqatigiinnut oqaasii amigaateqarnerarlugillu upperinngilai.

Taassuma eqqartukkat qanoq anguneqarnissaannik aamma eqqartuinissaq maqaasivaa, taamaammat Naalakkersuisut iliuutsimikkut piviusunngortitsisinnaanerminnik takutitsisariaqartut isumaqarpoq.

- Amigaaterput tassaavoq inuiaqatigiittut qanoq ineriartorsinnaanerput (oqaasertalerneqassasoq aaqq.). Inuussutissarsiornerup, aningaasarsiornerup, avammullu tunisassiornerup atugarissaarnerput namminiilivikkiartornissarpullu akilertussaavaat. Aningaasat taakkua atorfissaqartippagut, qanoruna taava pilersinniarigut? Kisianni qanoq tassunga killissanersugut eqqartorneqanngilaq, Jens-Frederik Nielsen oqarpoq.

Nielsen: Piviusut killormoortuupput

Taassuma oqalugiaat pitsaanerup ajornerullu qeqqanut inissinnagu ajornermut qaninnerusutut inissippaa. Illuatungiliuuttoqataasa Siumup Atassutillu oqalugiaat aamma naammagisimaarnagu pitsaanerpaap ajornerpaallu qeqqannut siusinnerusukkut inissippaat.

Naalakkersuisut siulittaasuata, Múte B Egedep, ilaqutariinnerup ineqarnerullu pitsaanerulernissaat oqalugiaaminni ilaatigut eqqavai. Tamakkuli illuatungiliuuttup upperinngilai.

- Upperinngilagut, oqaatsit kusanartorpassuit anninneqartarput, kisianni piviusumi iliuuserineqartartut amerlasuutigut killormuupput, Demokraatit siulittaasuat oqarpoq.

Taamami neriorsuuteqarneq naalakkersuisuusut neriorsuutaasa allat killiffiisut inerneqassasoq, taassuma aarleqqutigaa.

- Aalisakkaninngooq aalisartoqaqqissanngilaq pinngortitaq malinnaasinnaasariaqarmat. Kisiannili taakkua ilisimatuuninngaanniit oqariartuutigineqartartut tusaaneqanngillat, qaffaasoqarpoq. Ammanerusumik ingerlatsisoqassooq /neriorsuipput aaq.). Aatsaat immaqa taamak matoqqatigisumik ingerlatsisoqartumik misigivunga, Jens-Frederik Nielsen oqarpoq.