Illuatungiliuttut miliuunilinnik arlalinnik amigartooruteqarneq pillugu naalakkersuisoq akeqquaat
Ilinniartitaanermut, kultureqarnermut, timersornermut aamma ilageeqarnermut naalakkersuisoq Peter Olsen Inuit Ataqatigiinneersoq Campus Kujalliup aningaasaqarnera pillugu passussinini pillugu Kukkunersiuinermik Ataatsimiititaliamit sukannernerulersitamik isornartorsiorneqarnermi kingornatigut tusagassiuutinut nalunaarutip ataatsip saniatigut sunnguamilluunniit tutsaqarsimanngilaq.
Taamaattumik Kukkunersuinermik Ataatsimiititaliamut ilaasortaq Nivi Olsen Demokraatineersoq paragraf 37-mik taaneqartartumik allattuiffimmi apeqqutinik Peter Olsenimut apeqquteqarpoq.
- Apeqqutinik itisileeqqusisunik nassippara Campus Kujalliup siulersuisuisa aningaasanut missingersuummi qaanngiisoqarsimanera pillugu nalunaarfigisimaneraat paasiniassagatsigu. Apeqqutit taakku qulit suliap taama annertutigisumik kukkuluttorfiusimanera sumik peqquteqarneranik saniatigut paasissutissiissapput, Nivi Olsen oqarpoq.
Illuatungiuttunit annertunerusumik isornartorsiuineq
Sapaatip akunnera kingulleq partiit illuatungiuliuttut Demokraatit, Atassut aamma Naleraq naalakkersuisumik Peter Olsenimik tatiginninnginnermik oqaaseqaasiorlutik siunnersuuteqarput, taannali anigorpaa. Kisianni kingornatigut illuatungiliuttunit isornartorsiuineq annertusiartuinnarpoq.
Suliaq qanoq ingerlava?
- Kukkunersuiuinermik Ataatsimiititaliaq sukannernerulersitamik isornartorsiuinermik taaneqartartumik oqaaseqarpoq Campus Kujallermik, missingersuutini miliuuninik arlalinnik qaangiisimasumik, aningaasaqarnikkut aqutsineqannginneq pillugu.
- Kukkunersiuinermik Ataatsimiititaliamik isumaliutissiissut aallaavigalugu Demokraatit, Atassut aamma Naleraq Ilinniartitaanermut, Kultureqarnermut, Timersornermut aamma Ilageeqarnermut naalakkersuisumik Peter Olsenimik Inuit Ataqatigiinneersumik ulloq 15. novembari tatiginninnginnermik oqaasertalimmik siunnersuummik saqqummiipput.
- Naalakkersuisooqatigiit akillutik pinngitsoortitsiniarnermik siunnersuuteqarput, taannalu Siumumit aamma Inuit Ataqatigiinnit 21-usunit akuerineqarpoq – taamalu Peter Olsen naalakkersuisuuginnassaaq.
- Tallimanngormat Campus Kujalliup siulersuisuini siulittaasoq, Karsten Lyberth-Klausen, oqarpoq nammineq siulersuisullu 2017-imiilli naalakkersuisoqarfik ilisimatittarsimallugu ilinniarnertuunngorniarfiup missingersuutit qaangertarsimagai immikkullu ittumik aningaasaliissutissanik qinnuteqartarsimallutik, tunniunneqanngitsunilli.
KNR-ip tallimanngormat oqaluttuarimmagu Campus Kujalliup siulersuisuini siulittaasoq, Karsten Lyberth-Klausen, oqarsimasoq 2017-imiilli ilinniarnertuunngorniarfiup aningaasanik missingiutinik qaangiisarsimanera naalakkersuisoqarfimmut nalunaarutigisarsimallugu, Demokraatiinnaanngitsut Peter Olsen oqaaseqartikkumavaat.
- Naalakkersuisoq akisussaaffimmik tigusisimanngilaq, naak Kukkunersiuinermik Ataatsimiititaliamiit mianersoqqussummik qaffasinnerpaamik tunineqarsimagaluarluni, illuatungiliuttut partiianni Atassummii siulitaasoq, Aqqalu Jerimiassen oqarpoq nangillunilu:
AAMMA ATUARUK Peter Olsen: Campus Kujallermi aningaasaqarneq aaqqissaaq
- Nipaappallaaqaaq. Aningaasaqarnermut Akileraartarnermullu Ataatsimiitaliaq attaveqarfigisimasussaagaluarpaa immikkut aningaasaliissuteqartinniarlugu.
Piaaraluni imaluunniit piaarinani
Illuatungiliuttut apeqqutaat pingaarneq tassaavoq Peter Olsenip Campus Kujalliup miliuunilinnik amigartooruteqarnera ilisimasimaneraa, taamaattumillu siulersuisut saniatigut immikkut ittumik aningaasaliinissamik apeqqutaat sumiginnarsimaneraa.
- Naalakkersuisup ilisimasussaagaluarpaa missingersuutinik qaangiisoqarsimasoq, ilinniarfiullu aningaasaqarnera nakkutigisimasussaagaluarpaa. Aningaasaliissutinik qaangiisoqarsimasoq nalunngikkuniuk aningaasanik atuiinnarsinnaanngilaq, kisianni immikkut ittumik saniatigut aningaasaliinissamik qinnuteqaammik aningaasaqarnermut ataatsimiititaliamut nassitsissaaq. Tamannarpiaq kukkussutaavoq, Nivi Olsen oqarpoq.
Kisianni ilisimaviuk naalakkersuisup Peter Olsenip tamanna ilisimasimaneraa?
- Naluara. Inersuarmi oqaaseqarnissaminut periarfissaqarfigisamini imminut illersorniarluni oqaatsimik ataatsimilluunniit oqaaseqarsimanngilaq. Uffa tamanna nalunaaquttap akunneri marluk sinnerlugit oqalliserigaluaripput. Taamaattumik naalakkersuisumut tulluutissagaluarpoq oqaluttussinnaappatigut tamanna ilisimasimanerlugu. Ilimagaara ilinniarfimmik naalakkersuisoqarfiup aninngaasaliissutinik miliuunilikkaanik qaangiinerit taama amerlatigisut ilisimasimagai, Nivi Olsen oqarpoq.
KNR-ip arlaleriarluni Peter Olsen attavigisarsimagaluarpaa suliaq pillugu oqaaseqartinniarlugu, kisianni apersorneqarnissani kissaatigisimanngilaa.
