Peter Olsen: Campus Kujallermi aningaasaqarneq aaqqissaaq
- Kukkunersiuinermut Ataatsimiititaliap kaammattuuteqarnera Naalakkersuisut aammalu Campus Kujalliup akornanni suleqatigiinnissamut ilumooruppara, taamaattumillu sapinngisamik sukkanerpaamik ilinniarfiup siulersuisuinut attaveqassaanga oqaloqatigiinnermik aallartitsiumallunga, pissutsit matumani pineqartut siunissami uteqqinneqaqqunagit.
Inuit Ataqatigiinneersoq Peter Olsen illuatungiliuttunit pingasunngornermi unnukkut tatigineqarunnaarnini pillugu taama oqarpoq.
Peter Olsenimut tatiginnikkunnaarnermik taasititsiniarnerat Qaqortumi Campus Kujallermut aningaasaliissutissatut missingersuutigineqartunit 8,2 millionit koruuninik qaangiinermik pissuteqarpoq. Tamanna ukiuni kingullermi marlunnik pisartoq Kukkunersiuisut ataatsimiititaliaata isumaliutissiissutaani sakkortuumik isornartorsiorlugu oqaatigaa.
Sakkortusisamik isornartorsiuineq
Peter Olsen ilinniartitaanermut naalakkersuisutut ilinniarfeqarfimmi pisortat aningaasaataannik atuinermi politikkikkut akisussaasut qullersaraat.
AAMMA ATUARUK Naalakkersuisoq tatiginnikkunnaarnermik siunnersuuteqartoqareersoq: Pisoq ilungersunarluinnarpoq
Campus Kujallermut suleqatiginninneq maanna sukaterneqassasoq, Peter Olsen neriorsuivoq.
- Ilanngullugu Kukkunersiuinermut Ataatsimiititaliap ilinniarfimmik suleqateqaqqusinera peqatigiilluta naatsorsuuserinikkut aqutsinerup suliarinissaanik akueraara.
- Pissutsinik peqqissaartumik misissuisoqarnissaa tulliuppoq, taamaattumillu suliassaq aallartereerparput inuussutissarsiornermi ilinniartitaanernut inatsisiliornernik ataatsimut tamakkiisumik nalilersueqqinnissaq, tamatumani aamma aningaasaliissuteqartarnerni malittarisassat aamma Campus Kujalleq.
- Pingaaruteqarluinnarpoq Campus Kujallermi aningaasatigut ingerlatsinerup qanimut malinnaavigineqarnissaa, ilinniarfik ilinniarfiullu siulersuisui qanimut suleqatigalugit.
Ippassaq apersorneqarusunngitsoq
Naalakkersuisoq Peter Olsen ippassaq pingasunngornermi ulloq naallugu pissarsiariniarsarigaluarparput – iluatsinngitsumik. Oqaaseqartinnissaa ullumikkut sulissutigeqqissavarput.
Missingersuutit siornaannaq 27 procentimik qaangerneqarput. 2020-mi qaangiineq 23 procentimiippoq.
AAMMA ATUARUK Illuatungiliuttut Peter Olsenimut tatiginninngitsut
2021-mi aningaasaqarnermi qaangiinermi GUX-imi sulisut akissarsiaannut qaffaanermik pissuteqarpoq. Tamanna isumaqatigiissutit nutaat pissutigalugit pivoq.
