Naalakkersuisoq tatiginnikkunnaarnermik siunnersuuteqartoqareersoq: Pisoq ilungersunarluinnarpoq
- Pisoq ilungersunartutut Naalakkersuisup tiguaa. Eqqartorneqartut ilarparujussui Peter P. Olsenip naalakkersuisuunngikkallarnerata nalaaneersuupput taamaammallu misissueqqissaarnissaq pisariaqarpoq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik Demokraatit, Atassut, Nalerarlu naalakkersuisumut, Peter Olsenimut (Inuit Ataqatigiit) tatiginnikkunnaareernerata aqaguani taama nalunaaruteqarpoq.
Peter Olsen ullaap-tungaani oqaaseqarumanngilaq. Naalakkersuisoqarfiup oqarnera naapertorlugu ullup ingerlanerani tusagassiuutinut nalunaaruteqartoqassaaq.
Inatsisartuni ippassaq ulloq – naatsumik oqaatigalugu – pissanganartupilussuuvoq.
Attanneqarsinnaanngitsoq Naleraq oqarpoq
Illuatungiliuttut qinikkat qulingiluaasut Peter Olsen naalakkersuisuujunnaarsinniarpaat, taamaammat tatiginnikkunnaarnermik taasititsiniarput. Taakku Peter Olsen Qaqortumi Campus Kujallermut aningaasanik amerlavallaarujussuartunik akiliisimanermut akisussaasuusoraat.
Naalakkersuisoqatigiit tatiginninnginnermik taasititsinissamik pinngitsoortitsinissamut siunnersuuteqarlutik akissuteqarput, taannalu Siumumit Inuit Ataqatigiinniillu qinikkat 21-t akueraat – Peter Olsen taamaalilluni naalakkersuisuuginnarsinnaalluni.
AAMMA ATUARUK Illuatungiliuttut Peter Olsenimut tatiginninngitsut
Tamanna illuatungiliuttunik nuannaarutigineqanngilaq.
- Akuersissutitaqanngitsumik taama atsigisumik atuineq attanneqarsinnaanngilaq kimilluunniit politikerimit, Naleqqamit Hans Enoksen KNR-imut oqarpoq.
Taanna Atassutip siulittaasuanit taperserneqarpoq.
- Naalakkersuisup pisussaaffigivaa aningaasanik atuivallaartoqarsimappat siulliulluni iliuuseqartussaavoq akisussaaffeqarnini malillugu oqarlunilu uani eqqunngitsumik pisoqarsimavoq iliuuseqartariaqarpugut. Imaanngitsoq Inatsisartut oqariartussat sooq naalakkersuisoq iliuuseqannginavit uani, Aqqalu Jeremiassen KNR-imut oqarpoq.
Akissarsianik qaffaaneq nutarterinerlu
Demokraatit, Atassut Nalerarlu Peter Olsenimut tatiginnikkunnaarnermik taasititsiniarnerat Qaqortumi Campus Kujallermut aningaasaliissutissatut missingersuutigineqartunit millionilikkaanik qaangiinermik pissuteqarpoq.
Tamanna Kukkunersiuisut ataatsimiititaliaata isumaliutissiissutaani allassimasoq – Kukkunersiuisut ataatsimiititaliaatalu Campus Kujallermi aningaasaqarnermik aqutsinerup amigaataanera sakkortuumik isornartorsiorlugu novembarip ulluisa sisamaanni oqaatigaa.
Peter Olsen ilinniartitaanermut naalakkersuisutut ilinniarfeqarfimmi pisortat aningaasaataannik atuinermi politikkikkut akisussaasut qullersaraat.
Qaqortumi Campus Kujalleq. Assi: Google Streetview
Missingersuutit siornaannaq 27 procentimik qaangerneqarput. 2020-mi qaangiineq 23 procentimiippoq.
2021-mi aningaasaqarnermi qaangiinermi GUX-imi sulisut akissarsiaannut qaffaanermik pissuteqarpoq. Tamanna isumaqatigiissutit nutaat pissutigalugit pivoq.
Tamatuma saniatigut ilinniarfiup illutaanut aamma ikuallattoqarnissaanik sillimaniarnermut pitsanngorsaanermut immikkut aningaasartuuteqartoqartoq, 2020-mi aqutsisut nalunaarusiaanni allassimavoq.
Ilinniartitsisunik amerlanerusunik atorfinitsitsinissaq pisariaqarsimavoq, tamannalu nutsernermi aningaasartuutinik annertuunik nassaqarpoq kiisalu pikkorissaanissamut immikkut aningaasartuuteqartoqarluni.
Campus Kujallerlu Nukissiorfinnit kommunimiillu ukiunut siuliinut attuumassuteqartunik akiligassarsisimasoq, Campus Kujallermi forstanderiusimasoq, Henrik Ebbe Nielsen 2020-mi naatsorsuutinik nasuiaanermi paasissutissiivoq.
Campus Kujallermi aningaasaqarneq
2021:
- Campus Kujallermut 2021-mi aningaasat atorneqartussatut akuerisat: 16.834.000 koruunit
- 2021-mi atuineq: 21.408.000 koruunit
- Missingersuutinik qaangiineq: 4.574.000 koruunit - assigalugu 27 procentit
2020:
- Campus Kujallermut 2020-mi aningaasat atorneqartussatut akuerisat: 16.834.000 koruunit
- 2020-mi atuineq: 20.715.000 koruunit
- Missingersuutinik qaangiineq: 3.881.000 koruunit - assigalugu 23 procentit
2019:
- Campus Kujallermut 2019-imi aningaasat atorneqartussatut akuerisat: 16.257.000 koruunit
- 2019-imi atuineq: 16.257.000 atuineq
- Missingersuutinik qaangiineq: 0 koruunit / 0 procentit
