Illuliami qalissialiorneq marloriarluni ikuallattoortitsigaluarpoq

Ullut marluk iluani Nuummi qatserisartut ikuallaffiusumut ataatsimut ornigupput. Ikuallattoornerillu taakku marluk illuliap pappialarsualersorneranik peqquteqarput.

Allattoq Nutaarsiassaqartitsivik / Nyhedsredaktionen

juulip 09-at 2022 17:06

Nuummi Tuapannguani ualimut ippassarlu illuliat ilaanni ikuallattoqaleraluarpoq.

AAMMA ATUARUK Nuummi ikuallattoqartoq: Qatserisartut arlallit qatseriartortut

Arfininngornermi ualikkut nal. 13.30-p missaani Nuummi qatserisartut illuliap qaavani qalissialiornermi ikuallaleraluarneq peqqutigalugu ulappuseraluarput. Innerli maanna qaminneqareersoq, Nuummi politiiniit oqaatigineqarpoq.

- Illuliortut illuliap qaavani qalissialiornerminni ikuallattuuleraluarput, ippassaq aamma tassanerpiaq ikuallattooraluarput, Kalaallit Nunaata politiivini pigaartut ittuat Bent Johnsen KNR-mut oqarpoq.

Politiit qatserisartullu tallimanngormat nalunaaqutaq 17.30 ikuallattumukaapput, tamannalu illup qaavani pappialarsuup ikkunniarnerani ikuallattuuleraluarnermik peqquteqarpoq.

- Isumaqarluta, ippassaq ikuallaleraluartoq aamaarsimasoq, paasinarsivorli pappialarsuarmik nutaamik ikkussueqqinnerup nassataanik ikuallanneq alla pileraluartoq, taanna oqarpoq.

Bent Johnsen nangilluni nassuiaavoq, ikuallattoqartillugu saaffiginnittorpassuusartut, matumanili ataasiinnaq saaffiginnissimavoq.

Politiiniit ikuallaleraluarnerup malunnartorujussuunnginnera iluarisimaarpaat.

Nutaarsiassami kukkunermik nassaarsimaguit uunga allaffigineqarsinnaavugut.