Ilulissani qimussit aqqutaat uloriagineqartoq

Ilulissani takornariaqarfissuarmi, takornariaanerusunik qimussiussisartut, aqqusineq nerukitsoq qimussimik aallarnerminni aqqutigisartagartik isornartoqartippaat.

Kisianni aqqusineq taanna, Atersuit kujataatungaanniittoq, qimmilivinnut illoqarfiup kangiatungaaniittunut ingerlanermi aamma bilerfigineqartarpoq, soorlu qimusserpassuit aallarnerminni sukkaqalutik tamanna aamma aqqutigisaraat.

Aqqusiniararli tikinngilaarlugu pisuinnarnik meerartalinnik inoqarnersoq, bileqarnersoq allanilluunniit ulorianartorsiorsinnaasoqarnersoq takujuminaattoq, suliffeqarfimmik, qimussernermut tunngasunik suliaqartarfimmik, Arctic Living Ilulissani, piginneqataasoq oqarpoq.

- Inuup inuuneranik akeqarsinnaavoq. Imaassinnaavoq meeqqat imaassinnaavoq uagut qimusserluta, Ane Sofie Lauritzen KNR-mut oqarpoq.

Ajutoortut

Taassuma assersuutigaa piginneqatini, qimussertilluni takornariamik aqqusiniaqqap taassuma aallartinnerani apuilluni kaluaanera. Tassani aqqusiniaqqami biilertoq qimussertup tunganut ingerlammat, qimmit inuit katersuussimasut akornannut qimaapput.

Ane Sofie Lauritzenillu oqarnera naapertorlugu takornariaq najugasumigut annerujussuarami taassuma takornarianissani taamaatiinnartariaqarsimavaa.

Taamaattumik qimussiussisartut taakkua aqquserngup taassuma angallaffiujunaaminissaa siunertaralgu bilinik ingerlaffigeqqusaajunnaarsikkusuppaat.

- Bilinik taakunga ukiukkut pulasarneq unittariaqaraluarpoq, ajortoqannginnissaa piniarlugu, Ane Sofie Lauritzen oqarpoq.

Siulittaasoq: Kissaammik anngussigitsi

Taama pisoqassappat Avannaata Kommuniani kommunalbestyrelse aalajangeqqaassaaq.

Teknikkimut ataatsimiititalimi siulittaasup kissaateqartut kissaatiminnik ataatsimiititaliamut apussinissaat kaammattuutigaa.

- Matugallarnissamik eqqarsaat takorloorsinnaavara oqallisigineqarsinnaasoq, Niels Davidsen oqarpoq.

Taassumami aqqut aamma uloriagaa.

- Uanga nammineerlunga qimusserfigissagukku takorlooreersinnaavara ulorianassasoq, aamma massakkut aputaasannera ilutigalugu sermiinnangajaangami, taanna oqarpoq.

Naatsorsueqqissaartarfiup kisitsisaatai naapertorlugit Ilulissani qimmit qimuttut siorna 3.096-nik amerlassuseqarput.