Immikkoortortaq millionilinnik aningaasaligaq Sermersuumik nakkutiginnissasoq

Pitsaassutsimut immikkoortortap nutaap Kommuneqarfik Sermersooq nakkutigissavaa.

Tamanna Kommunalbestyrelsimi partiit suleqatigiittut, Naleqqap aamma IA-p siunnersuutigigaat, kommuni tusagassiuutinut allappoq.

Partiit siunnersuutigisaat tassaavoq, kommuni immikkoortortaamik nutaamik, Pitsaassutsimut immikkoortortamik taaguuteqartumik pingasunillu sisamanilluunniit sulisoqartumik, pilersitsissasoq. Immikkoortortap kommunip inatsisinik maleruagassanillu allanik unioqqutitsinnginnissaa qulakkeerniassavaa.

- Angussavarput innuttaasut suli pitsaanerusumik aamma suli kukkuluttornertaqannginnerusumik sullinneqarnissaat, Kommuneqarfik Sermersuup borgmesteria, Avaaraq Olsen (IA), pingasunngornermi Qanoruumut oqarpoq. 

Taassuma Pitsaassutsimut immikkoortortap kommunip karsianut ukiumut 2 millionit koruunit missaannik akeqassangatippaa.

Kukkunerit amerlavallaartut

Innuttaasunut eqquisunik ukiuni arlalinnik kukkusoqartareersoq taama ittumik pilersitsilerput.

- Ukiuni kingullerni kukkunerpassuit uuminartut pilertarsimapput aammalu kommunip innuttaasunik sullissiniarnerani periarfissanik ajornerulersitsisarsimallutik, Avaaraq Olsen tusagassiuutinut nalunaarummi oqarpoq.

Kommunimummi aamma isornartorsiuisut imaaginnavipput. Tamanna inatsisinik unioqqutitsinerpassuanik, ilaatigut pisortat aningaasaataannik atornerluinerusunik, peqquteqarput.

Ineqarnermut suliaq, kommunip aningaasartuutigeqisaminik namminersorlutik sanaartortunut 2015-miili isumaqatigiissusiorsimanera, tamatumunnga assersuutissaavoq. Suliaq kommunimut 2020-mi 11 millionit koruuninik, 2021-mi 17 millionit koruuninik 2022-milu 27 millionit koruuninik akeqarpoq.

AAMMA ATUARUK Kommuneqarfik Sermersuumi borgmesteriusimasup ineqarnermut suliaq pillugu isornartorsiuineq ilungersunartumik tigugaa

Taava aamma kommunip pisortaanerisimasaa, Lars Møller-Sørensen, politikerinit akuerineqanngitsumik niueqatigisartakkaminit 12,5 millionit koruunit atorlugit 2019-mi quersuarsivoq. Kommunip quersuaq taanna tamatuma kingorna ukiumut 1,7 millionit koruuninik akiliisarluni attartorpaa. Suliami allami kommunip pisortaanerisimasani ”aningaasanik peqquserluuteqarsimasutut pasillugu” politiinut 2021-mi oktoberimi oqaatilliissutigaa.

AAMMA ATUARUK Tusagassiuutit: Kommunimi pisortaanerusimasoq ikinngutiminit quersuarsisoq

Taava aamma pisortat ilaata isimigut suliaritinnera pisortaqarfiullu kommunimit akiliunneqarlutik angalanerat kommunip inatsisinik unioqqutitsilluni akilermagit Ombudsmand isornartorsiuivoq.

AAMMA ATUARUK Isornartorsiuineq: Kommunimi qullersaqarfimmi sulisut akiliunneqarlutik feeriartarsimapput

Nutaartaqanngitsoq

Pitsaassutsimut immikkoortortaq nutaarli Kommuneqarfik Sermersuumi nakkutiginnittuulluni siulliunngilaq.

Militsitsineq Inatsiseqarnerlu pillugit Immikkoortortaqarfik kommunimi pisortaanerup suliassaqarfiani immikkoortutut 2019-imi ukiakkut pilersinneqarpoq.

Immikkoortortap inatsisit malittarisassallu kommunimut tunngavigeqquneqartut tamarmik malinneqarnissaat suliassallu atuutsilerneqarnissaat siunertaraa.

Immikkoortortarli iluatsitsiviungaanngilaq, siuariartoqanngimmammi. Tamanna Kommuneqarfik Sermersuumi attaveqaqatigiinnermut pisortap, Lars Damkjærip KNR-iut uppernarsarpaa.

Immikkoortortami inatsisileritooq – immikkoortortami kisiartaalluni atorfeqartoq – ukiup affaata matuma siorna soraarmat immikkoortortaq atorunnaarsinneqarpoq.

Suliniut akuersaaraa, kisianni…

Kommunimi illuatungiliuttut partiiata Siumup kommunimi suleqatigiit inatsisissatut siunnersuutaat akuersaarlugulu isumatsialaasoraa. Bestyrelsimi ilaasortaq Siumullu gruppiani siulittaasoq, Inga Dora G. Markussen KNR-imut mailikkut allappoq.

Partiilli immikkoortortap kommunimi pisortaanermut toqqaannartumik ataannarnissaa naammagisimaanngilaa.

- Misissorsimavarput eqqortumik inatsisit malinneqarnissaannut immikkoortortami suut suliarineqassanersut, tamannali allaffissornermik ingerlatsisut arlaleriarlutik tusaanngitsuusaartanngikkunikku arlaleriarlutik pingaanngitsuunerarnikuuaat, Inga Dora G. Markussen allappoq.

Tamannalu tunuliaqutaralugu immikkoortortap nutaap borgmesterip aningaasaqarnermullu ataatsimiititaliap ataaniinnissaa Siumup kissaatigineruaa.

Immikkoortortaq nutaaq qaqugu atulissanersoq Avaaraq Olsenip suli naluaa.

- Siunnersuutip Kommuneqarfik Sermersuumi Aningaasaqarnermut inuussutissanullu ataatsimiititaliamut saqqummiunneqarnissaa kissaatigaara, taamaammat inisseriarpat qaqugu aallartissinnaanissaa paasissavarput, borgmesteri Qanoruumut oqarpoq.