Nakkutilliisitat atomip nukinganik nukissiorfimmut misissuiartorlutik Ukrainemut tikittut
Naalagaaffiit Peqatigiit (FN) atomip nukinganik atuinermik nakkutilliissitaaneersut 14-it Ukrainep kangisinnerusortaani illoqarfimmut Zaporizjzjamut ullumi pingasunngornermi tikipput.
Taakku atomip nukinganik nukissiorfissuarmi ajoquteqarnersoq isumannaallisaanermilu atortut misissussavaat.
Ruslandip Ukrainellu sorsuunneranni nukissiorfiup qanittuanut qaartartumeerisoqartarsimavoq.
Nukissiorfissuaq taanna russit sakkutuuinit marsimi tiguarneqarpoq.
Atomip nukinganik nukissiorfissuup taassuma russinik tiguarneqarnerata kingorna ajunaarnersuaqarsinnaanera, Naalagaaffiit Peqatigiit atomip nukinganik atuinermik nakkutilliisoqarfianit aarlerisaarutigineqarpoq.
AAMMA ATUARUK Nakkutilliisitat Ukrainemi atomip nukinganik nukissiorfissuarmi misissuiniartut
Nukissiorfissuup eqqaani qaartartunik igeriussisoqartarsimaneranik russit ukrainemiullu imminnut pisuutittaqattaapput.
Naalagaaffiit Peqatigiit atomip nukinganik atuinermik nakkutilliisoqarfianneersut Kyivimeereerlutik ullumi pingasunngornermi ulloqeqqanngitsoq Zaporizjzjamukaarneranni, russit nukissiorfissuup eqqaani saassussisimasutut pasineqarput.
Russit illoqarfimmi Energodarimi atomip nukinganik nukissiorfissuup ungasinngisaanittumi qaartartumeerisimasutut ukrainemiunit pasillerneqarput.Illoqarfik Zaporizjzja atomip nukinganik nukissiorfissuarmit nalunaaquttap akunneri marluinnaat atorlugit biilinik tikinneqarsinnaagaluartoq, Naalagaaffiit Peqatigiit atomip nukinganik atuinermik nakkutilliisoqarfianneersut tassunga qaqugu tikissanersut ilisimaneqanngilaq.
