Inuunera naallugu parnaarussassanngortitaq Seth Sethsen misiliummik anisinneqartussanngortoq
66-nik ukiulik Seth Sethsen, ukiut 36-t matuma siornali inuuneq naallugu parnaarussaasussanngorlugu parnaarunneqarsimasoq, imaassinnaavoq aniguigaluttualersoq.
Pinerlussimasunik isumaginnittoqarfiummi Seth Sethsen misiliummik anisinneqarnissaa maanna aalajangerpaa, taannaavortaaq ukiuni nutaajunerusuni inuuffigisatsinni Danmarkimi sivisunerpaamik parnaarusimaneqartunut akuusoq.
Seth Sethsen Albertslundimi taxartitsisumik toqutsinermi kingorna 1985-mili parnaarunneqarpoq.
Seth Sethsen taamanikkut 30-nik ukioqartoq, toqutsinerup kingorna ullualuit qaangiuttut tigusarineqarpoq, taassumalu taxartitsisumik Kurt Gaarn-Larsenimik toqutsisimanini erngerlunilu nassuerutigaa.
Tillinniarniarsimasoq
Namminerli nassuiaanera naapertorlugu, aallaammik igeriarnerit marluk piaarinaatsoornerusimapput, tillinniarniartillunimi uippallertuulersimavoq taamaalillunilu angutip toqussutigisaanik seqqortoorluni.
AAMMA ATUARUK Inuunini naallugu paarnaarussaq Seth Sethsen ukiut 36-t qaangiuttut iperangaarusuttoq
Seth Sethsenip illersuisuata Henrik Stagetornip suliap inerneranut naammagisimaarinninnini isertuutinngilaa.
Henrik Stagetornip oqarnera naapertorlugu Sethip aneqqanerani atugassarititaasut killigititassallu suussanersut Pinerlussimasunik isumaginnittoqarfiup maanna suliaraa, tamannalu peqqutaalluni qaqugorpiaq anisitaanissaa piumaarnersoq suli ilisimaneqanngikkallarpoq.
